Ջիդդայում հակաահաբեկչական հանդիպման մասնակից երկրներում արտգործնախարարները պայմանավորվել են խոչընդոտել օտարերկրյա գրոհայինների՝ Սիրիա և Իրաք ներթափանցելուն: Այս մասին գրում է Ria Novosti-ն` վկայակոչելով սաուդյան ԶԼՄ-ներին:
Հիշեցնենք, որ հինգշաբթի օրը Սաուդյան Արաբիայի Ջիդդա քաղաքում հանդիպում է տեղի ունեցել ծայրահեղական կազմակերպություններին դիմակայելու շուրջ: Նախևառաջ դա վերաբերում է Սիրիայում և Իրաքում հսկայական տարածքներ զավթած «Իսլամական պետությանը»:
Բանակցություններին մասնակցել են 12 երկրների արտաքին գործերի նախարարներ, որոնց թվում՝ արաբական 6 միապետությունների և Իրաքի, Եգիպտոսի, Լիբանանի, Հորդանանի, ԱՄՆ-ի և Թուրքիայի:
Ամփոփիչ հայտարարությունում ասվում է մասնակից երկրների՝ «ահաբեկչական կազմակերպություններին համատեղ ուժերով դիմակայելու» հստակ մտադրության մասին: Մասնավորապես՝ փաստաթուղթը ստորագրած պետությունները մտադիր են «դադարեցնել Սիրիա և Իրաք հարևան երկրների տարածքից գրոհայինների ներթափանցումը, վերջ դնել մուսուլմանական երկրներից նման կազմակերպություննեի ֆինանսավորմանը»: Նրանք նաև պարտավոր են մարդասիրական օգնություն ուղարկել գրոհայիններից տուժած շրջաններ: Այս փաստաթուղթը ստորագրել են բոլորը, բացի Թուրքիայից:
