Ազգային ժողովում մայիսի 15-ի արտահերթ նիստում ԲՀԿ խմբակցության քարտուղար Նաիրա Զոհրաբյանը «Գնումների մասին» օրենքում փոփոխություններ և լրացումներ կատարելու մասին օրենքի նախագծի քննարկման ժամանակ դիմելով հիմնական զեկուցող, ԱԱԾ պետի տեղակալ Արզուման Հարությունյանին՝ նշեց, որ ինքը տպավորություն ունի, թե կա՛մ բերված նախագծին զեկուցողը հաստատապես ծանոթ չէ, կա՛մ լուրջ խառնաշփոթ կա, կա՛մ այս նախագիծը ծագել է հայտնի դեպքերից հետո, երբ նախորդ վարչապետն իրեն թույլ էր տալիս վարձել ինքնաթիռներ և դրանցով շրջագայել հարկատուների հաշվին: Զոհրաբյանի խոսքով՝ որպեսզի մամուլը դրան չանդրադառնա, այսպես հապճեպ կերպով բերվել է այս նախագիծը:
«Ես գնացի հետ, անգամ Ստալինի ժամանակներում չտեսա նման դեպք, երբ բարձրաստիճան անձանց ծախսերը գաղտնի արվեն: 21-րդ դարում մենք մեզ հռչակել ենք ժողովրդավար, սոցիալական, իրավական պետություն, և պաշտոնատար անձանց ծախսերը պիտի հանրությունը, հարկատուն չիմանա՞, թե իր հաշվին ինչ ծախսեր է անում պաշտոնյան: Էստեղ մենք իրապես լուրջ վերանայման խնդիր ունենք: Եթե կա թերհասկացության կամ խառնաշփոթի խնդիր՝ ծախսերի որ մասն է արվելու գաղտնի, որը՝ հրապարակային, ես կխնդրեմ նախագիծը կառավարությունը հետ տանի, և փորձենք հասկանալ՝ իրականում խոսքն ինչի մասին է»,- ասաց նա:
Հարությունյանը պատասխանեց, որ խոսքն այստեղ կոնկրետ այն պաշտոնատար անձանց ծախսերի և ծառայությունների մասին է, որ համաձայն օրենքի՝ պետական պահպանության օրենքով սահմանված ապահովություն են իրականացնում: Նա նշեց, որ հարցը ոչ թե հանրությունից գաղտնի պահելն է, այլ ընդհանուր վերլուծության արդյունքում հանգել են այն եզրակացության, որ կարևորը պահպանության մակարդակի լիարժեքությունն ապահովելն է:
ԱԱԾ ներկայացուցիչը նշեց, որ պահպանության ավելի բարձր ապահովման խնդիրն է դրված, իսկ ծախսերին, ցանկացած տիպի, միևնույն է, այսպես թե այնպես տեղյակ են լինում: «Տրանսպորտային ծախսերը, որ դուք մեջբերեցիք, կարող եմ ասել՝ տվյալ խնդիրը չի եղել, որ մենք նման նախագիծ ենք առաջ բերել»,- ասաց նա:
ԲՀԿ-ական պատգամավորն արձագանքեց՝ նշելով, որ ինքն էլ է խոսում կոնկրետ՝ պետական պահպանության ենթակա անձանց մասին: «Ի՞նչ է տեղի ունեցել, ի՞նչ ЧП է տեղի ունեցել, ի՞նչ անլուծելի խնդիր, ե՞րբ է պետական գաղտնիք բացահայտվել, որ չպիտի բացահայտվեր, որ նման կարիք է առաջացել: Ի վերջո, ցանկացած փոփոխություն պետք է ունենա տրամաբանական հիմք»,- ասաց նա՝ հավելելով, որ ապրիորի ասել՝ վերլուծությունները հանգեցրել են նրան, որ հիմա պիտի ամեն ինչը՝ նրանց հետ կապված, բերեն, գաղտնիության գրիֆի տակ անցկացնեն, ապա դա, իր կարծիքով, հիմնավոր փաստարկ չէ:
Լուսանկարը՝ Hetq.am-ի