ԱԺ «Ժառանգություն» խմբակցության ղեկավար Ռուբեն Հակոբյանն այն կարծիքին է, որ իրենց և «Ազատ դեմոկրատներ» կուսակցության միջև առաջացած խնդիրը համապետական նշանակության հարց չէ և պետք չէ նման մեծ քննարկումների առարկա դարձնել: Հանրային հեռուստաընկերության «Հարցազրույց» հաղորդման եթերում Ռուբեն Հակոբյանը նշել է, որ համաձայն չէ այս գործընթացում «ապահարզան» բառի գործածման հետ, քանի որ խնդիրը վերաբերում է միմիայն Խաչատուր Քոքոբելյանին, իսկ «Ազատ դեմոկրատների» հետ իրենք որևէ խնդիր չունեն:
«Միությունը եղել է գաղափարական հենքի վրա. դա նոր ձեռագիր էր քաղաքականության մեջ, որովհետև մեր քաղաքական մշակույթում, ցավոք, գաղափարական հենքի վրա ձևավորված միավորումներ չեն եղել այս 20-22 տարիների ընթացում: Մենք փորձեցինք միասնական թիմի հիմքում դնել գաղափարական հենքը: Մենք ռիսկային քայլ կատարեցինք և փորձեցինք երկարաժամկետ միավոր ձևավորել: Ստացվել է այն, ինչ ստացվել է: Ես կուզենամ, որ Հայաստանում բոլոր միավորումները գաղափարական հենքի վրա լինեն. առաջին փորձը չի ստացվում, հույս ունեմ, որ մնացածը կստացվեն»,- նշել է Ռուբեն Հակոբյանը՝ հավելելով, որ երկարաժամկետ գործողությունների ծրագիր էր մշակված և ինքը չէր ցանկանա, որ անձի պատճառով առաջացած խնդիրները տարածվեին կուսակցությունների վրա:
Ինչպես հայտնի է, Խաչատուր Քոքոբելյանը խմբակցության՝ երկուշաբթի օրը կայացած նիստում առաջարկել էր Ռուբեն Հակոբյանի փոխարեն խմբակցության ղեկավար ընտրել Զարուհի Փոստանջյանին: Անդրադառնալով թեմային՝ Ռուբեն Հակոբյանն ասել է հետևյալը. «Ինձ համար զարմանալի է, որ դուրս եկա խմբակցության սենյակից,և լրագրողներն ասացին, որ դրված է Զարուհի Փոստնջյանի հետ փոխելու հարցը: Հիշեցնեմ, որ ընտրվել եմ միաձայն: Իմ թեկնածությունն առաջադրել է Խաչիկ Քոքոբելյանը: Բայց երբ որոշվեց, որ այլևս ինքը չի ներկայացելու «Ժառանգությունը», նա էլ այդպիսի առաջարկ արեց, որը պահի տակ առաջացած հարց էր, և, չգիտես ինչու, դարձավ քննարկման առարկա»,- ասել է Ռուբեն Հակոբյանը:
«Ժառանգություն» խմբակցության ղեկավարի խոսքերով, Խաչատուր Քոքոբելյանի կողմից խախտվել են այլ պայմանավորվածություններ ևս: Նա նշել է, որ «Ազատ դեմոկրատներ» կուսակցության ղեկավարն իր պահվածքով հարվածի տակ է դնում Ալեքսանդր Արզումանյանին, թաքնվում է կուսակցության հետևում և կասկածի տակ է դնում այդ որակով կուսակցության հետագա առաջխաղացումը: «Հնարավոր է, որ մարդը սխալվել է, չի պատկերացրել, թե ուր կհասնի սա»,- եզրակացրել է Ռուբեն Հակոբյանը:
Խմբակցության ղեկավարը նաև նշել է, որ ինքն ու Զարուհի Փոստանջյանը դեմ են եղել, որ Քոքոբելյանի հետ կապած այս խնդիրը Րաֆֆի Հովհաննիսյանը բարձրաձայնի՝ նկատի ունենալով, որ առաջիկայում նախագահական ընտրություններ են, և հարցը կչարչրկվի: Սակայն Րաֆֆի Հովհաննիսյանը նշել է, որ չի պատրաստվում ճանապարհ գնալ մի գործչի հետ, ով իրեն խաբում է:
Կատարվածը, սակայն, Ռուբեն Հակոբյանի խոսքերով, չի ազդի Րաֆֆի Հովհաննիսյանի՝ առաջիկա նախագահական ընտրությունների հետ կապված մտադրության վրա:
