«Հետևելով քաղաքական դաշտում ծավալվող իրադարձություններին՝ «Ժառանագություն» կուսակցությունը նոր լուծումների կողմնակիցն է: Հարգանք տածելով բոլոր նախագահների հանդեպ, քննադատելով նրանց իրենց արած-չարածի համար՝ գիտակցում ենք, որ պետք է նախագահի նոր թեկնածու». այսօր լրագրողների հետ հանդիպմանը այս մասին ասաց «Ժառանգություն» կուսակցության ղեկավար Րաֆֆի Հովհաննիսյանը: Նա շեշտեց, որ «Ժառանգությունը» պատրաստ է աջակցել այն թեկնածուին, որը կկոնսոլիդացնի հասարակությանը, քանի որ եթե գալիք նախագահական ընտրություններին ընդառաջ դա չլինի, չի լինի ևս քսան տարի:
Անդրադառնալով խոսակցություններին, թե ինքն իր թեկնածությանն աջակցելու շուրջ քննարկումներ է կազմակերպել ԲՀԿ ղեկավարի և ՀՅԴ ղեկավարի հետ՝ նա ասաց, որ դրանք լուր չեն, քանի որ իրականությանը չեն համապատասխանում, իսկ մանրամասնելով՝ ասաց, որ նման հանդիպումներ չեն եղել, թեև ինքը բաց է հաղորդակցության համար:
ՀՀ նախագահին ուղղած իր նամակի առնչությամբ Ր. Հովհաննիսյանն ասաց, որ փոխանակ իր շատ պարզ նամակների վերաբերյալ տունտունիկ խաղալու, իրեն հուզական, հնարքային համարելու, թող պատասխան տան այս նամակում բարձրացված հարցերին:
Թեև ասաց, որ շնորհակալ է, որ այս անգամ վերջապես ՀՀ ԱԺ նախագահ Հովիկ Աբրահամյանը պատասխանեց Սերժ Սարգսյանին ուղղած իր նամակին:
«Գուցե նախագահը պատվից ցածր է համարել պատասխանել։ Ես կուզեի կետ առ կետ պատասխան, ոչ թե դեկլարատիվ պատասխան: Թող շարքային քաղաքացուն ասեին՝ ճիշտ է, թե սխալ է, որ գյուղապետարանի, քաղաքապետարանի վրա կա մեկ կուսակցության զինանշակ, տարբերանշան, լոզունգ: Թող ասեին՝ ճիշտ է, թե սխալ է, որ հանրային սեփականություն հանդիսացող շենքերի վրա կա կուսակցական տարբերանշան: Թող պատասխան տան՝ ինչու ուսուցիչները ստիպված հանրահավաքների են մասնակցում, զինվորները՝ ստիպված քվեարկում:
Խնդրում եմ՝ հասկանանք, որ այստեղ կուսակցական հարց դրված չէ, որևէ մեկին պաշտպանելու կամ պախարակելու հարց չէ, սրանք պատասխանի կարոտ հարցեր են»,- մեկնաբանեց Րաֆֆի Հովհաննիսյանը՝ նշելով, որ եթե այդ նամակի պատասխանն իր առաջադրած հարցերին համապատասխանում է՝ ուրեմն ապագայում սպասվում է հերթական ընտրությունը:
