Լիբիայի Բենղազի քաղաքից առևանգել են ռուսական արտադրության սպառազինությունը, որը մնացել էր տապալված Մուամար Քադաֆիի ժամանակներից: Շարժական զենիթահրթիռային համալիրներն անհետացել են «Ռաֆ Ալլալ Ալ-Սահաթի» խմբավորման բազայից: Այս մասին The Washington Post թերթին տված հարցազրույցում հայտնել է այդ խմբավորման ղեկավար Իսմայիլ Սալաբին:
Սալաբիի խոսքերով՝ սպառազինությունը դուրս է հանվել անցյալ հանգստյան օրերին, երբ մի քանի հազար ցուցարարներ գրոհով վերցրել են ռազմաբազան և իսլամիստներից անհապաղ զինաթափում են պահանջել: Նման հարձակման ենթարկվել է ևս մեկ անօրինական խմբավորում՝ «Անսար Ալ-Շարիա»-ն, որոնց զինյալները, նախքան Քադաֆիի վարչակարգի տապալումը, պայքարում էին գնդապետի զինված խմբավորումների դեմ:
Իսմայիլ Սալաբիի խոսքերով՝ խմբավորման բազայից անհետացել է մեծ քանակությամբ շարժական զենիթահրթիռային համալիրներ, ինչպես նաև 1000-2000 միավոր միավոր հրազեն: Նրա խոսքելով՝ իրենք չգիտեն, թե ովքեր են կանգնած հարձակման ետևում, սակայն Լիբիայի իշխանությունները և ԱՄՆ-ը մտավախություն ունեն, որ այն կարող է հայտնվել ահաբեկիչների ձեռքում: Ամերիկյան հետախուզության տվյալներով՝ այժմ Լիբիայի տարածքում գտնվում են մասնավորապես «Ալ-Քաիդան Մաղրիբի երկրներում» խմբավորման զինյալները:
ԱՄՆ-ը պնդում է, որ այս պահին Լիբիայի տարբեր խմբավորումներ իրենց տրամադրության տակ ունեն հարյուրավոր շարժական զենիթահրթիռային համալիրներ, որը ապստամբները խլել էին Քադաֆիի զորքերից: Նման համալիրները կարող են լուրջ սպառնալիք դառնալ ուղևորատար և բեռնատար ինքնաթիռների համար:
Որոշ փորձագետներ կարծում են, որ համալիրները ոչ թե գողացվել են, այլ խմբավորումը դրանք վաճառել է, և ռազմաբազայի վրա հարձակումը հարմար առիթ է դա կոծկելու համար:
