Կոլումբիացի հայտնի երգչուհի Շակիրայի նախկին փեսացուն դատական հայց է ներկայացրել նրա դեմ՝ պահանջելով 45 մլն դոլար փոխհատուցում վճարել 2011թ. հունվարին հարաբերությունները պաշտոնապես խզելուց հետո: Այս մասին հաղորդում է Eldiaro24.com-ը:
Արգենտինայի նախկին նախագահի որդու՝ Ֆերնանդո դե լա Ռուա Անտոնիոյի խոսքերով (նրա հետ Շակիրան հանդիպել է մոտ 10 տարի), իր ֆինանսական հավակնությունները բացատրվում են նրանով, որ երգչուհու հետ համատեղ կյանքի ընթացքում ինքը ստիպված է եղել զոհել գովազդային գործակալի իր կարիերան՝ հրաժարվելով շահավետ պայմանագրերից և առաջարկներից, որոնք կարող էին նրան ավելի քան 200 մլն դոլարի եկամուտ բերել: Դրանցից հրաժարվելու պատճառը եղել է այն, որ նա իրեն ամբողջությամբ նվիրել է երգչուհու կարիերային՝ դառնալով նրա գործակալը:
Որպես իրեն հասցված վնասի փոխհատուցում՝ արգենտինացին հաշվել է, որ միանգամայն օրինական կերպով կարող է պահանջել իրենց համատեղ հարաբերությունների ընթացքում վաստակած 252 մլն դոլարի 18%-ը, այսինքն՝ 45 մլն դոլար:
Սակայն դա արգենտինացու հավակնությունների մի մասն է: Դե լա Ռուան նաև հետաքրքրված է Շակիրայի հետ համատեղ կյանքի ընթացքում ձեռք բերած Ուրուգվայի առանձնատնով և Նյու Յորքի բնակարանով:
Երգչուհու փաստաբանը հայտարարել է, որ նա պարտավոր չէ որևէ լրացուցիչ գումար վճարել՝ բացի այն, ինչը սահմանվել է ամուսնական պայմանագրով:
Անտոնիո դե լա Ռուան և Շակիրան բաժանվել են երկու տարի առաջ: Այժմ երգչուհին հանդիպում է իսպանական «Բարսելոնա» թիմի պաշտպան Խերար Պիկեի հետ և նրանից երեխա է սպասում: