ԱՄՆ Դեմոկրատական կուսակցության համագումարին նախագահ Բարաք Օբամայի ելույթը, որը նախատեսված էր անցկացնել հինգշաբթի երեկոյան, տեղի կունենա ոչ թե մարզադաշտում, ինչպես ավելի վաղ հաղորդվում էր, այլ Time Warner Cable Arena փակ հրապարակում: Պատճառը կանխատեսված եղանակային վատ պայմաններն են: Այս մասին հաղորդել է France Presse գործակալությունը:
«Մենք հետևել ենք օդերևութաբանական կանխատեսումներին, ըստ որոնց` տարածաշրջանում սպասվում են ամպրոպներ: Անվտանգության նկատառումներից ելնելով` որոշել ենք հանդիպումը տեղափոխել Time Warner Cable Arena»,- ասվում է միջոցառման կազմակերպիչների հայտարարության մեջ:
Նախօրեին Շարլոտ քաղաքում ելույթ է ունեցել ԱՄՆ առաջին տիկին Միշել Օբաման: Նա պատմել է իր ամուսնու մանկության և երիտասարդության տարիների և այն մասին, թե ինչպես են իր ամուսնուն փոխել նախագահության տարիները: Միշել Օբաման նշել է, որ բարձր պաշտոնը չի փոխել իր ամուսնուն, այլ միայն օգնել է բացահայտել նրա բնավորության նոր գծեր:
