ՀՀ ԱԺ պատգամավոր, Հայաստանի ֆուտբոլի ֆեդերացիայի նախագահ Ռուբեն Հայրապետյանից հրապարակային ներողություն և որպես փոխհատուցում 1 (մեկ) լումայի բռնագանձում պահանջող Հելսինկյան քաղաքացիական ասոցիացիայի Վանաձորի գրասենյակի նախագահ Արթուր Սաքունցի հայցը Երևանի Կենտրոն և Նորք-Մարաշ վարչական շրջանների ընդհանուր իրավասության դատարանն այսօր մերժել է: Սակայն Արթուր Սաքունցը «Առաջին լրատվական»-ի հետ զրույցում նշեց, որ միանշանակ բողոքարկելու է վճիռը վերաքննիչ դատարան:
Հիշեցնենք, որ Արթուր Սաքունցի կողմից հայցադիմում ներկայացնելու համար հիմք է հանդիսացել 2012 թ. մայիսի 25-ին Հայաստանի հանրային հեռուստաընկերության «Լրացուցիչ ժամանակ» սպորտային հաղորդման ժամանակ Հայաստանի ֆուտբոլի ֆեդերացիայի նախագահ Ռուբեն Հայրապետյանի կատարած հետևյալ արտահայտությունները. «Երբ որ ես Վանաձորում ուզում եմ ֆուտբոլի դպրոցը կառուցեմ, ոչ մի ծառ, ոչ մի թուփ չկա, սարի վրա դպրոց եմ կառուցում, բայց, չգիտես ինչի, հայտնվեց Հելսինկյան մի հատ ինչ-որ անհասկանալի օղերով շան ծնունդ ու բռնեց դատի տվեց մեզ, քաղաքապետարանին, ավագանու որոշումը, այդ թվում` ֆեդերացիան էլ որպես երրորդ կողմ, պատասխանող կողմ: Հիմա դրանք մի քանի կոպեկ արտասահմաններից էդ գրանտները ստանում են, իրանց գրանտների հաշվին ցանկացած գեղեցիկ բան այսօր վարկաբեկում են»:
Նշենք, որ Ռուբեն Հայրապետյանի փաստաբան Լուսինե Բեկումյանը դատարանին արդեն ներկայացրել է գրավոր պատասխան, որով պատասխանող կողմը պահանջում է ամբողջությամբ մերժել հայցապահանջը` հիմնավորելով, որ հաղորդման ընթացքում Ռ. Հայրապետյանը «Հելիսինկյան մի հատ ինչ-որ անհասկանալի օղերով շան ծնունդ» ասելով նկատի չի ունեցել Արթուր Սաքունցին, քանի որ վերջինս, իրենց գիտենալով, երբեք օղեր չի կրել: Իսկ երբ նիստը նախագահող դատավորը եղելությունն ապացուցելու բեռը, այն է` Ռ. Հայրապետյանը Ա. Սաքունցին է նկատի ունեցել, բաշխեց հայցվոր կողմի ներկայացուցչի վրա, փաստաբանի կողմից Ռ. Հայրապետյանի փաստաբանին ուղղված այն հարցին, թե` եթե ոչ Ա. Սաքունցին, ապա ում է ուղղված Ռ. Հայրապետյանի արտահայտությունը, Լուսինե Բեկումյանը հետևյալ կերպ պատասխանեց. «Մենք դատարանում ենք, և հիմա չեմ կարող գուշակություններ անել»:
