Կարմիր խաչի միջազգային կոմիտեի հաղորդակցման ծրագրի ղեկավար Աշոտ Աստաբացյանը, պարզաբանելով, որ Կարմիր խաչի միջազգային կենտրոնն ունի չեզոք միջնորդի կարգավիճակ, տեղյակ չէր, թե երբ տեղի կունենա հայ եւ ադրբեջանցի ռազմագերիների փոխանակումը: Եվ երբ կողմերը գալիս են համաձայնության, նրանք դիմում են Կարմիր խաչին, եւ իրենք՝ որպես միջազգային միջնորդ, հայրենադարձման այդ օպերացիան կատարում են: «Ներկա պահին միայն կարող եմ հավաստիացնել, որ Կարմիր խաչի միջազգային կենտրոնը պատրաստ է ցանկացած պահի տվյալ գործողությունը իրագործելուն: Բնականաբար, համապատասխան դիմում-պահանջի դեպքում»,- եզրափակեց Աշոտ Աստաբացյանը:
Հիշեցնենք, որ Աստրախանում Հայաստանի, Ռուսաստանի եւ Ադրբեջանի նախագահների եռակողմ հանդիպման արդյունքներով ստորագրված համատեղ հայտարարության մեջ ասված է, որ Հայաստանի ու Ադրբեջանի նախագահները պայմանավորվեցին, որպես առաջին քայլ, անհապաղ ռազմագերիների եւ զոհվածների դիակների փոխանակում կատարել` ԵԱՀԿ Մինսկի խմբի եւ Կարմիր խաչի միջազգային կոմիտեի աջակցությամբ: Հիշեցնենք, որ Ադրբեջանում կա 11 հայ գերի եւ պատանդ` 6 հայ ռազմագերի եւ մեկ ընտանիք` բաղկացած 5 անձից, իսկ Հայաստանում` 3 ադրբեջանցի գերի ու պատանդ: Սակայն ՊՆ լրատվական բաժնի ղեկավար Մուշեղ Աղեկյանը տեղյակ չէր, թե մոտավորապես երբ տեղի կունենա ռազմագերիների փոխանակումը եւ առաջարկեց Կարմիր խաչի միջոցով ճշտել, թե երբ տեղի կունենա փոխանակումը:
