Ելույթ ունենալով Սիեթլում կայացած խաղային կոնֆերանսի ժամանակ` Valve ընկերության ղեկավար Գեյբ Նյուելը հայտարարել է, որ Windows 8 օպերացիոն համակարգն «աղետ» է դառնալու համակարգչային ոլորտի համար: Այս մասին հաղորդում է All Things Digital պորտալը:
Ընկերությունը որոշել է զբաղվել Linux-ի համար խաղերի զարգացմամբ:
«Մեծ խնդիրը, որը խանգարում է Linux-ին, խաղերն են: Մարդիկ չեն գիտակցում, թե որքան կարևոր են խաղերը սպառողներին խթանելու համար: Մենք ուզում ենք, որ բոլոր՝ Steam ծառայության 2500 խաղերը հեշտությամբ տեղավորվեն Linux համակարգի վրա: Այդպիսով՝ մենք ցանկանում ենք ապահովագրվել»,- ասել է Գեյբ Նյուելը:
Valve-ը քննադատել է սենսորային ղեկավարումը: Նա նկատել է, որ այն երկար չի կիրառվի: «Մկնիկն ու ստեղնաշարը դիմացել են 25 տարի, իսկ touch-ը 10 տարուց ավելի չի դիմանա»:
Valve-ի գլխավոր արտադրանքը թվային բաշխման Steam ծառայությունն է, որում հասանելի է ավելի քան 2500 խաղ: Ծառայությունը գործարկվել է 2003 թվականին: Այնտեղից հնարավոր է գնել նաև խաղեր՝ նախատեսված Windows և Mac օպերացիոն համակարգերի համար: Ստուդիան զբաղվում է նաև սեփական խաղերի արտադրությամբ: 2012-ին կթողարկվեն երկու խաղեր՝ Counter-Strike-ի նոր տարբերակն ու DotA 2-ը:
Գեյբ Նյուելը` Valve-ի հիմնադիրը, մինչև ընկերությունը հիմնելը, 13 տարի աշխատել է Microsoft կորպորացիայում՝ Windows շարքի արտադրանքների վրա: Նա ընկերությունը լքել է 1996 թվականին: