Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քիչ առաջ ավարտվեց Արթուր Սաքունցն ընդդեմ Ռուբեն Հայրապետյանի գործով նախնական դատական նիստը:
Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցի համար հայցադիմում ներկայացնելու հիմք է հանդիսացել 2012 թ. մայիսի 25-ին Հայաստանի հանրային հեռուստաընկերությամբ ցուցադրված «Լրացուցիչ ժամանակ» սպորտային հաղորդումը, որտեղ հաղորդման հյուրը` Հայաստանի ֆուտբոլի ֆեդերացիայի նախագահ Ռուբեն Հայրապետյանը, կատարել է հետևյալ արտահայտությունները. «Երբ որ ես Վանաձորում ուզում եմ ֆուտբոլի դպրոցը կառուցեմ, ոչ մի ծառ, ոչ մի թուփ չկա, սարի վրա դպրոց եմ կառուցում, բայց, չգիտես ինչի, հայտնվեց Հելսինկյան ինչ-որ անհասկանալի օղերով մի հատ շան ծնունդ ու բռնեց` դատի տվեց մեզ, քաղաքապետարանին, ավագանու որոշումը, այդ թվում` ֆեդերացիան էլ` որպես երրորդ կողմ, պատասխանող կողմ: Հիմա դրանք մի քանի կոպեկ արտասահմաններից էդ գրանտները ստանում են, իրանց գրանտների հաշվին ցանկացած գեղեցիկ բան այսօր վարկաբեկում են»:
Հայցվորի ներկայացուցիչ Կարեն Թումանյանը այսօր դատարանում հայտնեց, որ «Լրացուցիչ ժամանակ» սպորտային հաղորդման ժամանակ Ռուբեն Հայրապետյանի կողմից նշված «Հելսինկյան ինչ-որ անհասկանալի օղերով մի հատ շան ծնունդ» արտահայտությունը արատավորում է Արթուր Սաքունցի պատիվն ու արժանապատվությունը:
Հայցվոր կողմը դատարանից պահանջում է Ռուբեն Հայրապետյանին պարտավորեցնել հրապարակայնորեն ներողություն խնդրել Արթուր Սաքունցից` հետևյալ բովանդակությամբ. «Ես` Ռուբեն Հայրապետյանս, 2012 թ. մայիսի 25-ին Հանրային հեռուստատեսության «Լրացուցիչ ժամանակ» հաղորդաշարի եթերում թույլ եմ տվել ոչ պատշաճ, վիրավորական արտահայտություններ «Հելսինկյան քաղաքացիական ասամբլեայի Վանաձորի գրասենյակ» հասարակական կազմակերպության նախագահ Արթուր Սաքունցի հասցեին, որի համար ներողություն եմ խնդրում»:
Ի դեպ` հայցվոր կողմը այսօր դատարանում հայտնեց, որ պահանջում է նաև փոխհատուցում` 1 լումայի չափով, իսկ ապացուցման բեռը հայցվոր կողմի վրա է:
Սակայն դատարանում այսօր Ռուբեն Հայրապետյանի ներկայացուցիչ, ՀՀ փաստաբանների պալատի անդամ, փաստաբան Լուսինե Բաղումյանը պատասխան ներկայացրեց, ըստ որի` իրենց տեղեկություններով՝ «Սաքունցը ոչ մի անգամ օղեր չի կրել»:
Հայցվոր կողմի ներկայացուցիչ Կարեն Թումանյանը դատարանից 14 օրվա ժամկետ խնդրեց` հաղորդմանը ներկա գտնված անձանց որպես վկա դատարան գալու համար միջնորդելու և ապացուցելու, որ վիրավորական արտահայտությունը վերաբերում է հենց հայցվորին:
Ի դեպ, իբրև պատասխանող է ճանաչվել նաև ՀՀ հանրային հեռուստաընկերությունը, որը ներկայացնում էր իրավաբանական բաժնի պետ Արմեն Բաղդասարյանը:
Նախնական դատական հաջորդ նիստը նշանակվել է օգոստոսի 8-ին, ժամը 13.30-ին:
