ԱՄՆ նախագահի հանրապետական թեկնածու Միթ Ռոմնին այսօր մեկնում է արտասահմանյան մեծ շրջագայության, որի ընթացքում կայցելի Մեծ Բրիտանիա, Լեհաստան, Իսրայել, ինչպես նաև պաղեստինյան տարածքներ:
Ինչպես սպասվում է` այդ շրջագայության ընթացքում Ռոմնին կներկայացնի արտաքին քաղաքականության վերաբերյալ իր նախընտրական ծրագիրը: Առաջին կանգառը Լոնդոնն է, որտեղ նա կհանդիպի Բրիտանիայի վարչապետ Դևիդ Քեմերոնի և մյուս նախարարների հետ: Հուլիսի 27-ին նա կմասնակցի Օլիմպիադայի բացման արարողությանը:
Հանգստյան օրերին Ռոմնին կայցելի Իսրայել, որտեղ հանդիպում կունենա վարչապետ Բենիամին Նեթանյահուի, նախագահ Շիմոն Պերեսի, ինչպես նաև ընդդիմության ներկայացուցիչների հետ: Այնտեղ նախատեսված է նաև Ռոմնիի ելույթը, որը հավանաբար կլինի Երուսաղեմում: Այս մասին հաղորդում է Ria Novosti-ն:
Թեկնածուի շտաբը հաղորդել է պաղեստինյան վարչակազմի, մասնավորապես` ինքնավարության վարչապետ Սալամ Ֆայադի հետ հանդիպում նախապատրաստելու մասին: Ռոմնին Իսրայել է այցելում ամերիկյան վարչակազմի դեմ իսրայելական լոբբիի քննադատությունների ֆոնին: Քննադատությանն ի պատասխան` Օբամայի շտաբի ներկայացուցիչը հայտարարել էր, որ Օբաման վերընտրվելու դեպքում կայցելի Իսրայել, որտեղ նա վերջին անգամ եղել էր նախընտրական արշավի ժամանակ:
Ռոմնին հասցրել է խոստանալ, որ նախագահ ընտրվելու դեպքում առաջին արտասահմանյան այցը կկատարի Իսրայել:
Հուլիսի 30-ին Ռոմնին կլինի Լեհաստանում, որտեղ բանակցություններ կվարի վարչապետ Դոնալդ Տուսկի և նախկին նախագահ Լեխ Վալեսայի հետ:
Երեքշաբթի օրը Ռոմնին հիշատակել էր Լեհաստանի անունը` խոսելով Եվրոպայում հակահրթիռային պաշտպանության համակարգի ստեղծման ամերիկյան ծրագրերի վերանայման մասին:
