Չգիտեմ` ինչն է պատճառը, որ ՀԱԿ-ն ԱԺ-ում դեռ չի բարձրացրել Մարտի 1-ի հարցը: Այսօր «Առաջին լրատվական»-ի հետ զրույցում ասաց 2008 թվականի մարտի 1-ի զոհ Տիգրան Խաչատրյանի մայրը՝ Ալլա Հովհաննիսյանը: Նա նշեց, որ չի կարող ասել, թե ինչն է պատճառը, որ մայիսի 6-ի ընտրություններից հետո ՀԱԿ-ը դեռ խորհրդարանում չի բարձրացրել Մարտի 1-ի հարցը: Նրա խոսքով` ՀԱԿ-ը մշտապես, մինչ դա բարձրացրել էր այդ հարցը և միգուցե սպասում է ինչ-որ նոր նախաձեռնությամբ հանդես գալ:
«Մենք` ծնողներով ինքներս սպասում ենք նրան, որ ՀԱԿ-ն այդ հարցն առաջ քաշի` հույս ունենալով, որ հետևողական կլինի»,- հստակեցրեց Ալլա Հովհաննիսյանը: Նա նաև ասաց, որ մի քանի օր առաջ կարդացել է` Ջհանգիրյանն ասել է, որ ԱԺ-ում պետք է Մարտի 1-ի ժամանակավոր հանձնաժողովի հարցն առաջ քաշել:
Անդրադառնալով Մարտի 1-ի գործով Փաստահավաք խմբի անդամ Անդրանիկ Քոչարյանի այն պնդմանը, թե Մարտի 1-ի թեման ոչ միայն եվրակառույցների, նաև ՀԱԿ-ի համար գնաց սառեցման ուղիով` ասաց, որ դա նրա կարծիքն է, որի իրավունքը նա ունի: Ալլա Հովհաննիսյանը նշեց, որ հարգելով Անդրանիկ Քոչարյանին՝ չի կարող նրա կարծիքը մեկնաբանել, քանի որ նա իր կարծիքի համար կարող է պատասխան տալ: «Ես Անդրանիկ Քոչարյանին գիտեմ, նա շատ մեծ աշխատանք է կատարել Մարտի 1-ի Փաստահավաք խմբում, իր աշխատանքի շնորհիվ է հայտնվել «Կորսված գարուն» ֆիլմը, որը «Մարտի 1» հասարակական կազմակերպությունը տարածել է բոլոր դեսպանատներով»,- իր երախտագիտության խոսքն ասաց Տիգրան Խաչատրյանի մայրը:
Անդրադառնալով խորհրդարանական ընտրություններին ընդառաջ ձևավորված ՀԱԿ-ԲՀԿ համագործակցությանը միասնական շտաբի շրջանակում` Ալլա Հովհաննիսյանն ասաց, որ ԲՀԿ-ում Վարդան Օսկանյանի և Գրիգոր Գրիգորյանի ներկայությունն իրեն վանում է այդ կուսակցությունից: Ըստ նրա` եթե նախագահական ընտրություններին միասնական թեկնածուն ԲՀԿ-ից լինի, չի հավատում, որ ՀԱԿ-ը կսատարի ԲՀԿ թեկնածուին, ինքը չի սատարի:
«Ես դա ասում եմ «եթե», որովհետև չեմ հավատում, որ ՀԱԿ-ը նման բան կանի: Ես կոնկրետ գործակցություն չեմ տեսնում ՀԱԿ-ի և ԲՀԿ-ի միջև: Այն բոլոր միջոցները, որոնցով կարելի է այսօրվա իշխանություններին հեռացնել իշխանությունից, այսինքն` իշխանափոխություն անել, կողմ եմ և ողջունում եմ: «Կոնսենսուս-Սերժ»-ը դուր է գալիս ինձ, բայց ԲՀԿ-ին ես ձայն չեմ տա: Բայց միգուցե դա քաղաքականություն է, պետք է լայն ճակատով պայքարել, որպեսզի կարողանան այսօրվա իշխանությունից ազատվել, որից հետո ես կարծում եմ, որ ՀԱԿ-ը պետք է դնի Մարտի 1-ի պատասխանատուների հարցը, նաև նրանց, ովքեր ԲՀԿ-ից են»,- մեկնաբանեց Ալլա Հովհաննիսյանը:
