Սուդանը չի ռմբակոծել Հարավային Սուդանի Հանրապետության տարածքը, կիրակի օրը РИА Новости-ին հայտնել է Սուդանի բանակի հատուկ ներկայացուցիչ Հալեդ Սաադը:
«Ազգային-ազատագրական բանակի զորքերը թեև Սուդանի տարածքում են` Արևելյան Դարֆուրի որոշ շրջաններում, Սուդանի բանակը մասնակցություն չի ունեցել Հարավային Սուդանի Հանրապետության (ՀՍՀ) դեմ ձեռնարկված գործողություններին, և տեղեկություններն այդ մասին հիմնավոր չեն»,- ասել է Սաադը:
Նրա խոսքով` օդային հարվածները Դարֆուրի դիրքերից հասցրել են «Հանուն արդարության և հավասարության շարժման» ապստամբական խմբավորումները, որը հովանավորվում է Ջուբայի կողմից:
Նախօրեին Հարավային Սուդանը Խարտումին մեղադրել էր իր տարածքում նոր օդային արշավների համար և դադարեցրել էր բանակցությունները, որոնք տեղի էին ունենում երկու երկրների միջև Ադիս Աբեբայում:
Ինչպես ВВС-ի Սուդանի լրագրողներին հայտնել է հարավսուդանական բանակի հատուկ ներկայացուցիչ Ֆիլիպ Ագուերը, նախորդ օրը Հյուսիսային Բախր-էլ-Գազալի տարածքում ութ հարված է եղել, ինչի հետևանքով վնասվածք է ստացել երկու մարդ:
Խարտումին համարելով Հարավային Սուդանի տարածքում պայթյունի պատասխանատու` ՀՍՀ-ն որոշել է դադարեցնել բանակցությունները, որոնք տեղի են ունենում Եթովպիայի մայրաքաղաում` Աֆրիկյան միության միջնորդությամբ:
«Մենք չենք կարող նրանց հետ բանակցությունների սեղանի շուրջ նստել այն ժամանակ, երբ նրանք ռմբակոծում են մեր հողերը»,- լրագրողներին հայտարարել է հարավսուդանական պատվիրակության ներկայացուցիչ Ատիֆ Կպիրը:
ՄԱԿ-ի ԱԽ-ի 2046-րդ բանաձևի ընդունման համաձայն` մինչև օգոստոսի 2-ը Խարտումը և Ջուբան պետք է ավարտեն բանակցությունները և որոշում կայացնեն հակամարտության, դրան առնչվող` երկրի ժողովրդավարացման, Աբեյ շրջանի վիճելի տարածքի պատկանելության և տարանցիկ նավթի գումարի վճարման շուրջ:
Հարավային Սուդանը Խարտումից բաժանվեց և անկախ հանրապետություն դարձավ ավելի քան մեկ տարի առաջ, բայց բոլոր խնդիրները, որոնք չէին հաջողվում լուծել մինչև Ջուբայի անկախության ստացումը, դժվարացնում են հարաբերություները երկու երկրների միջև:
Ներկայումս Խարտումը և Ջուբան փորձում են համաձայնության գալ սահմանում ապառազմականացված բուֆերային գոտի ստեղծելու հարցի վերաբերյալ, որպեսզի կանխեն իրենց տարածքում ապստամբական շարժումների գրոհները:
