Արցախում տեղի ունեցավ իշխանության լեգիտիմացում: Այսօր լրագրողների հետ հանդիպման ժամանակ ասաց քաղաքագետ Ալեքսանդր Մարկարովը՝ խոսելով հետընտրական Արցախից, ադրբեջանական կողմի տրամադրություններից և ընտրություններից:
Նրա խոսքով՝ մինչև ընտրությունները խոսվում էր, որ ցանկացած պետականության կառուցման գործընթացում կարևոր են ընտրությունները, ուստի կարելի է առանձնացնել մի քանի գործոն: Ըստ քաղաքագետի՝ առաջինն ընտրություններին ժողովրդավարական իշխանության ձևավորումն է, որը, բանախոսի գնահատմամբ, Արցախն իրականացրել է:
«Երկրորդը՝ մենք տեսնում ենք, որ տեղի է ունենում ընդդիմության ինստիտուցիոնալիզմ․ ընտրություններից հետո հիմնական թեկնածուներից մեկը ստանում է ձայների մեկ երրորդը, աննախադեպ երևույթ է, երբ ազատ ընտրությունների ժամանակ ընդդիմադիր թեկնածուն ստանում է ձայների լուրջ զանգված և տեղի է ունենում ֆորմալիզացիա։ Երրորդը համակարգի լեգիտիմացումն է՝ ինչպես երկրի ներսում, այնպես էլ միջազգային հանրության աչքերում։ Լեգիտիմացումը, որը տրվեց իշխանությանն Արցախում, ընտրությունների արդյունքում դարձավ փաստ»,- մեկնաբանեց քաղաքագետը:
Անդրադառնալով ընտրությունների վերաբերյալ Մինսկի խմբի համանախագահների հայտարարություններին՝ քաղաքագետն ասաց, որ տողատակերում շատ բան կար: Նրա խոսքով՝ անմիջապես հայտարարությունների մեջ կար անդրադարձ, որ իշխանությունները ձևավորվում են ժողովրդավարական եղանակով, և դա փաստ է:
Քաղաքագետ Ալեքսանդր Մարկարովը նաև խոսեց ադրբեջանական հիստերիայի մեղմացումից՝ ասելով, որ դրա պատճառը նաև այն է, որ արդեն մի քանի անգամ տեղի են ունեցել ընտրություններ, որը ցույց է տալիս քաղաքացիների անմիջական մասնակցությունը ընտրություններին, քաղաքական գործընթացներին: «Ադրբեջանական ռեակցիան թուլացել է, որովհետև ակնհայտ է, որ տեղի են ունենում պետականաշինական գործընթացներ, և Ադրբեջանում ի հայտ է գալիս սերունդ, որի համար ռադիկալ փոխհարաբերությունները դառնում են անհնար: Ընկալման մեջ կա շատ հստակ մի բան, որ սա անկախ պետություն է՝ սեփական քաղաքական նախապատվություններով և աստիճանաբար տեղի է ունենում ինստիտուցիոնալիզմը»,- եզրափակեց իր խոսքը Ալեքսանդր Մարկարովը:
