Կառավարության նախագծով նախատեսվում է փոփոխություն կատարել Ընդերքի մասին Հայաստանի Հանրապետության օրենսգրքում և «Բնապահպանական և բնօգտագործման վճարների մասին» ՀՀ օրենքում: ԱԺ տնտեսական հարցերով մշտական հանձնաժողովում տեղի ունեցող քննարկումների ժամանակ հանձնաժողովի նախագահ Վարդան Այվազյանը նշեց, որ ներկայումս ընդերքի օգտագործման օրենսդրական դաշտը կատարյալ չէ, առկա են բացթողումներ, որոնք բարդացնում են պետության և ընդերքն օգտագործողների հարաբերությունները:
Ֆինանսների փոխնախարար Սուրեն Կարայանը, ներկայացնելով օրենսդրական փոփոխությունը, նշեց, որ անհրաժեշտ է սահմանել մետաղական և օգտակար հանածոնների և դրանց վերամշակման արդյունքի իրացման համար բնօգտագործման վճարներ:
Կարայանը տեղեկացրեց, որ բնօգտագործման ու բնապահպանական վճարների մասին ներկայիս օրենքի համաձայն, բնօգտագործման վճարներ գանձվում են՝ ելնելով մարված պաշարներից և եթե շահութաբերությունը գերազանցում է 25 տոկոսը: Յուրաքանչյուր 0,8 տոկոսային կետաճի դեպքում վճարվում է 0,1 տոկոսը:
Ներկայացված նախագծով առաջարկվում է հրաժարվել վճարման այս ձևից և առաջարկվում է, որպեսզի բնօգտագործման վճարի գանձումը իրականացվի՝ ելնելով իրացման հասույթից: Ի դեպ, օրենսգրքի փոփոխության նախագծում հստակ նշված չէ, թե հասույթի քանի տոկոսը պետք է գանձվի պետբյուջեից: Այվազյանը ցանկացավ հստակեցնել այդ հանգամանքը և հարցրեց, թե ով է սահմանելու այդ դրույքաչափը.սահմանելու է կառավարությունը:
«Հնարավո՞ր է, որ կառավարությունը սահմանի հասույթի 100 տոկոսը»,- հարցրեց Այվազյանը։ «Տրամաբանական է, որ ոչ, այդքան չի սահմանվի»,- պատասխանեց Կարայանը:
