Բրիտանական The Daily Mail-ն անդրադարձել է մի ընտանիքի վերամիավորման պատմության, որի հերոսները պարտական են Facebook սոցիալական ցանցին: Վերջին անգամ մայրն ու դուստրը միասին էին եղել 1960-ականներին:
Վերամիավորվածները արդեն հասցրել են մի շարք նմանություններ բացահայտել. նրանք երկուսն էլ ձախլիկ են և աշխատում են հյուրանոցային ոլորտում:
Աշխարհի տարբեր ծայրերում գտնվող մարդկանց կապելու Facebook-ի առաքելությունն ապացուցված է:
Ստեֆանի Ֆիլիպսը օգտագործել է սոցցանցը՝ գտնելու համար մորը՝ Ջոան Վերմեյերին, որի հետ վերջին անգամ եղել էր շատ փոքր տարիքում: Նրանց մեկամսյա կապը երեքշաբթի ավարտվել է Deerfield Beach-ում՝ երկար սպասված հանդիպմամբ:
Ստեֆանի մայրը 17 տարեկան էր, երբ ամուսնացել է Ռիչարդ Բոթուինի հետ: Շուտով ծնվել է աղջիկը, որն այժմ 48 տարեկան է: Ամուսնու ընտանիքի հետ ունեցած խնդիրների պատճառով կինը ստիպված է եղել հեռանալ՝ փոքրիկին թողնելով ամուսնու խնամքին: Երեխան հոր հետ մնացել է Նյու Ջերսիում, իսկ մայրը, որն այժմ 67 տարեկան է, տեղափոխվել է Հարավային Ֆլորիդա և այնտեղ կրկին ամուսնացել: Նա մեկ երեխա է ունեցել, ևս մեկին որդեգրել:
Աղջիկը մոր հետ հանդիպումն անվանել է իրականություն դարձած երազ:
«Ինձ թույլ չէին տալիս մորս մասին հարցեր տալ: Հայրիկիս ընտանիքում այդ թեմայի վրա տաբու էր դրված»,- պատմել է Ստեֆանին, որին մորը գտնելու հարցում օգնել է ամուսինը:
