Տապակած հացի կտոր, որը մատուցվել էր բրիտանակն գահի ժառանգորդին 21 տարի առաջ՝ նախաճաշի ժամանակ՝ իր ամուսնության օրը, այսօր վաճառվել է Դերբիշիրի կոմսությունում աճուրդի ժամանակ 230 ֆունտ ստեռլինգով (360 դոլար): Այս տարիների ընթացքում տապակած հացի կտորը գտնվել է Բուկինհեմյան պալատի նախկին սպասուհու մոր հսկողության տակ: Տարեց կինը պահպանել է այն՝ որպես հուշ արքայազն Չարլզ Ուելսի և օրիորդ Դիանա Սպենսերի ամուսնության օրվանից:
Դեռևս ախորժելի տեսքը չկորցրած «սրբության» համար վճարողը Միացյալ թագավորության բնակիչներից մեկն է, ով դեռևս մնում է անհայտ:
«Հենսոս» աճուրդի տան ներկայացուցչի խոսքերով, աճուրդի հանված, ոսկեգույն, տապակած հացի կտորը ճանաչվել է տարվա ընթացքում երկրում աճուրդի հանված բազմաթիվ ուտելի իրերից ամենաթանկ վաճառվածը:
Ավելի քան երկու տասնամյակ առաջ հացի կտորը արքայազնի սեղանից ճաշարան է տարել Ռոզմարի Սմիթը, ում աղջիկը 1981 թ. ծառայել է Բուկենհեմյան պալատում: «Իմ աղջիկը եղել է սպասուհի, և նրա պարտականություններից մեկն էր արքայազնի սենյակից տանել նախաճաշի մնացորդով մատուցարանը,- աճուրդի նախօրեին բրիտանական լրագրողներին ասել է Սմիթը: -Ես այդ օրը պալատում էի նրա հետ և տեսա, որ Ձերդ Գերազանցությունը հացի մի կտոր չի կերել: Ես այնքան էի ուզում, որ ինչ-որ բան ինձ մոտ հուշ մնար հարսանիքի օրվանից, և նայելով նրան` ես մտածեցի՝ ինչու՞ ոչ: Արքայազն Չարլզը չէր հասցրել ո´չ ուտել իր հացը, ո´չ պատել այն կարագով կամ ջեմով: Եվ չորացրած հացը, պահվելով չոր տեղում, լավ պահպանվել է երկու տասնամյակ շարունակ»:
Չնայած նրան, որ հացի «ազնվական ծագման» մասին վկայում են միայն իր նախկին սեփականատիրոջ խոսքերը, նման անսովար իր գնել ցանկացողների պակաս չի նկատվում:
«Թագավորական ընտանիքը և այն ամենը, ինչ կապված է նրա հետ, այժմ հայտնի են ինչպես երբեք, և ես մտածեցի. իսկ միգուցե իմ հացի կտորը ևս կարժենա մի քիչ փող,- նշել է Սմիթը:-Հետաքրքրությունից դրդված` ես կապի մեջ մտա «Հենսոս»-ի գնահատողների հետ և հարցրեցի նրանց կարծիքը: Ես հաճելիորեն զարմացած էի, երբ նրանք ինձ ասացին, որ հավաքորդները կարող են ինձ համար թողնել բավականին պատկառելի գումար»:
