Արաբական ԶԼՄ-ներում ակտիվորեն քննարկվում է երեկ Դամասկոսում տեղի ունեցած ահաբեկչությունը, որին զոհ գնացին երկրի բարձրագույն ղեկավարության 4 ներկայացուցիչներ:
Լոնդոնում լույս տեսնող Al-Quds Al-Arabi թերթի գլխավոր խմբագիր Աբդել Բարի Ատուանը հայտարարել է, որ ահաբեկչությունը վկայում է սիրիական վարչակարգի էրոզիայի մասին: Նրա խոսքերով՝ ահաբեկչության կազմակերպիչները կարողացել են գտնել համակարգի խոցելի օղակները. անվտանգության ծառայություններն ի վիճակի չեն պաշտպանել վարչակարգի կողմնակիցներին և նրա առաջնորդին:
Սիրիական պետական Sana գործակալությունը տեղեկացնում է, որ Ռուսաստանը, Իրանը, Վենեսուելան վճռականորեն դատապարտել են Դամասկոսի ահաբեկչությունը:
Լիբանանյան The Daily Star պարբերականը մեջբերում է «Հըզբոլլահի» առաջնորդ Հասան Նասրալլահի հայտարարությունը, որում նա իր աջակցությունն է հայտնել Ասադին և հակամարտության կողմերին կոչ արել երկխոսություն սկսել՝ արյունահեղությունը դադարեցնելու համար:
Դամասկոսում լուրեր են պտտվում, որ ահաբեկչությունը կազմակերպվել է հենց Ասադի կողմից, որը նման ձևով չեզոքացրել է հնարավոր մրցակիցներին, որոնք հույս ունեին իրենից ազատվել պետական հեղաշրջման միջոցով:
Հիշեցնենք. երեկ առավոտյան, երբ Դամասկոսի Ազգային անվտանգության շենքում տեղի էր ունենում երկրի ղեկավարության հանդիպումը, ահաբեկչություն է իրականացվել, որի հետևանքով զոհվել են երկրի պաշտպանության նախարար Դաուդ Ռաջիհան և նրա տեղակալը՝ նախագահ Բաշար Ալ-Ասադի փեսա Ասեֆ Շաուկատը, պաշտպանության նախկին նախարար Հասան Ալ-Թուրքմանին, ներքին գործերի նախարար Մուհամմադ Ալ-Շաարը:
