Ինչպես տեղեկացնում է Новости-Грузия-ն, Վրաստանի ազգային անվտանգության խորհուրդը սկսում է ազգային անվտանգության հայեցակարգի նորացման գործընթացը:
Այս մասին տեղեկացրել է խորհրդարանի խոսնակ Դավիդ Բաքրաձեն` նշելով, որ այդ պրոցեսում ակտիվորեն ներգրավված է լինելու խորհրդարանը:
Արդեն վաղը անվտանգության խորհրդի ղեկավար Գեորգի Բոկերիան այցելելու է խորհրդարան, որպեսզի պատգամավորներին ծանոթացնի հարցի շուրջ առկա առաջարկներին:
«Անվտանգության հայեցակարգը կենդանի փաստաթուղթ է, որը պետք է պարբերաբար թարմացվի` երկրի ներսում և դրսում առկա իրավիճակն ու սպառնալիքները հաշվի առնելով»,- ասել է Բաքրաձեն:
Խորհրդարանական ընդդիմադիր ուժերն արդեն հայտարարել են, որ պատրաստ են մասնակցել գործընթացին:
