ԿԺԴՀ առաջնորդ Կիմ Չեն Ինին շնորհվել է հյուսիսկորեական բանակի մարշալի կոչում: Այս մասին հաղորդում է Itar-Tass-ը` հղում անելով երկրի կենտրոնական հեռագրային գործակալությանը:
Այսօր վաղ առավոտյան գործակալությունը հաղորդագրություն էր տարածել, ըստ որի` տեղական ժամանակով ժամը 12.00-ին (Մոսկվայի ժամանակով` 07.00-ին) երկրի ղեկավարությունը կարևոր հայտարարություն պետք է անի: Գործակալությունը վերջին անգամ նման ձևակերպմամբ էր հանդես եկել Կիմ Չեն Իրի մահվան լուրը հաղորդելու ժամանակ:
Այդ կոչումը կրել է նաև նրա հայրը: Վերլուծաբանների կարծիքով` կոչմանն արժանանալուց հետո առաջնորդը կամրապնդի իր իշխանությունը բանակի վրա:
Կիմ Չեն Ինին մարշալի կոչումը տրվել է բարձրագույն զինվորական պաշտոնում վերանշանակումների առիթով: Աշխատանքային կուսակցության քաղբյուրոի որոշմամբ` հեռացվել է բանակի գլխավոր շտաբի ղեկավար Լի Էն Հոն, ինչպես նշվում է` առողջական խնդիրների պատճառով: Վերլուծաբանները կարծում են, որ նրա հեռացումը քաղաքական ենթատեքստ ունի: 69-ամյա Հոն համատեղել է մի քանի պաշտոններ: Նա եղել է Աշխատանքային կուսակցության քաղբյուրոյի անդամ, կուսակցության կենտրոնական զինվորական կոմիտեի փոխնախագահ:
Այս նորությունը առաջացրել է տեղի լրագրողների նկատելի վրդովմունքը: Դրան արձագանքել են նաև Կորեայի Հանրապետության բորսաները:
