Ճապոնիայում այսօր իր աշխատանքն է վերսկսել Հոնսյու կղզու Ֆուկուի պրեֆեկտուրայում տեղակայված «Օի» ատոմակայանի 4-րդ էներգաբլոկը: Այն էներգիա կթողարկի շաբաթ օրվանից, իսկ ողջ հզորությամբ կսկսի գործել հուլիսի 25-ից: Այս մասին հայտնում է Itar-Tass-ը:
Այս ամսվա սկզբին վերագործարկվել էր երկրում առաջին ռեակտորը` «Օի» ատոմակայանի 3-րդ էներգաբլոկը, որի աշխատանքի վերսկսումն ուղեկցվել էր հարակից բնակավայրերի բնակիչների բողոքի ակցիաներով: Նրանք իրենց բացասական դիրքորոշումն էին հայտնել ատոմային էներգետիկայի օգտագործման վերաբերյալ:
Էներգաբլոկների վերագործարկման նախապատրաստական աշխատանքները հարթ չեն ընթացել: Մի քանի միջադեպեր են գրանցվել, որոնք, իհարկե, չեն ազդել ատոմակայանի անվտանգության և աշխատանքի վրա, սակայն լրացուցիչ առիթ են դարձել ատոմային էներգիայի հակառակորդների համար: Այս շաբաթ երկու անգամ 4-րդ էներգաբլոկում միացել է տագնապի ազդանշանը:
«Օի» ատոմակայանի երրորդ և չորրորդ էներգաբլոկները ներկայում համարվում են ողջ երկրում միակ գործող միջուկային ռեակտորները: Մնացած 49 պիտանի էներգաբլոկները գտնվում են տեխզննման փուլում կամ սպասում են վերագործարկման թույլտվության: Դրանց գործունեությունը դադարեցվել էր 2011-ի մարտի 11-ին տեղի ունեցած ավերիչ երկրաշարժի հետևանքով Ֆուկուսիմա-1 ատոմակայանում տեղի ունեցած վթարի պատճառով: Մինչ այդ ատոմակայանները ապահովում էին Ճապոնիային անհրաժեշտ էլեկտրաէներգիայի 1/3-ը: Դրանց բացը ներկայում լրացնում են նախկինում չաշխատող ջերմակայանները: Բնակչությանը հանձնարարվել է նվազեցնել էներգիայի օգտագործումը 5-15 տոկոսով` կախված շրջանից:
