Բելառուսական «Խարտիա» (charter97.org) կայքը «Ինչո՞վ է հայտնի օլիգարխ Գագիկ Ծառուկյանը» վերտառությամբ հոդված է գրել «Բարգավաճ Հայաստան» կուսակցության ղեկավար Գագիկ Ծառուկյանի մասին:
Հոդվածագիրը, անդրադառնալով Մինսկում հայկական կոնյակի արտադրության հոսքագծի բացմանը, գրում է, որ «դիկտատորը» (նկատի ունի Բելառուսի նախագահ Լուկշենկոյին), առաջին շիշը հանձնել է ձեռնարկության հիմնադիր Գագիկ Ծառուկյանին:
«Ո՞վ է այդ մարդը, որն ավելի վաղ Կոլյա Լուկաշենկոյին նվիրել էր 400 լիտր կոնյակ»,- հարց է տալիս հոդվածագիրը:
«- Սա նրա համար, որ դու խոսքի տեր մարդ ես, ասել ես՝ արել ես»,- հանդիսավոր գործարկմանը ասել է Լուկաշենկոն:
Բելառուսա-հայկական համատեղ կոնյակի գործարանը Բելառուսում հայտնի օլիգարխի առայժմ առաջին ու միակ բիզնեսն է: Կոնյակը տակառներով Հայաստանից տանում են Բելառուս, որտեղ էլ կատարվում է շշալցումը:
Հրատարակության մեջ այնուհետ ներկայացնում են որոշ կենսագրական փաստեր գործարարի կյանքից, «որին անվանում են Հայաստանի ամենահարուստ մարդ»:
«Բելառուսի հետ Գագիկ Ծառուկյանի հետ համագործակցության սկիզբ կարելի է համարել 2010 թ.: Սեպտեմբերի 30-ին Երևանում իր աշխատանքն սկսեց հայ-բելառուսական մանրածախ առևտրի կենտրոնը: Այն ժամանակ օլիգարխն իր երախտագիտությունը հայտնեց Ալեքսանդր Լուկաշենկոյին համատեղ նախագծի զարգացման գործում համագործակցության համար:
Հիշեցնենք, որ հենց Երևանի կոնյակի գործարանում է իր ժամին սպասում 400 լիտրանոց տակառը, որը կնքվել է Կոլյա Լուկաշենկոյի պատվին:
Այդ տակառը մի կողմ է դրվել 2010 թ.՝ Լուկաշենկոյի` Հայաստան այցի ժամանակ:
Ո՞վ գիտե, գուցե այդ ժամանակ էլ դրվել են հայ օլիգարխի և Բելառուսի պաշտոնական առաջնորդի «կոնյակային» համագործակցության հիմքերը»,- գրում է հոդվածագիրը: