Facebook սոցիալական ցանցը հաճախորդներին բավարարելու հեղինակությամբ զիջում է Google+ սոցցանցին: Վերջինս առաջին անգամ դարձել է Customer Satisfaction Index-ի առաջատարը:
Ինչպես տեղեկացնում է CNet.com-ը, 2012-ի տվյալներով՝ աշխարհում խոշորագույնը համարվող Facebook սոցիալական ցանցը, որը 901 միլիոն օգտատեր ունի, անցած տարվա համեմատ վարկանիշը գցել է 8 տոկոսով: Այն գնահատման 100 բալանոց սանդղակից ստացել է 61, մինչդեռ Google+ ցանցը՝ 78 միավոր:
ForeSee վերլուծական ընկերության հրապարակած ինդեքսում 230 սոցիալական մեդիա ընկերություններ են ընդգրկված:
Ըստ զեկույցի՝ Google ընկերության սոցիալական ցանցը բարելավում է դիրքերը, քանի որ ավանդական գովազդ չունի, ավելի մեծ ուշադրություն է դարձնում օգտատերերի տվյալների անվտանգությանը և ապահովում ավելի հարմարավետ բջջային տարբերակ: Իսկ Facebook-ի օգտատերերը շարունակ գանգատվոմ են գովազդներից, անվտանգության ոչ լիարժեք պաշտպանությունից, ինտերֆեյսի և հատկապես նորությունների ժապավենի հաճախակի փոփոխություններից:
Սոցիալական մեդիա ընկերությունների շարքում Google+ ցանցին հետևում է Wikipedia-ն՝ կրկին 78 բալով: Նրան հաջորդում են YouTube, Pinterest, All Others, Twitter,LinkedIn և Facebook ցանցերը՝ 73, 69, 64, 64, 63, 61 միավորներով:
Google-ը շարունակում է մնալ որոնողական պորտալների թվում հաճախորդներին բավարարող առաջատար ընկերություն: Այն ինդեքսի առաջատարն է՝ 82 միավորով: Նրան հաջորդում են Bing-ն ու Ask.com-ը՝ համապատասխանաբար 81 և 80 միավորներով:
Լրատվական կայքերի շարքում առաջատարը FoxNews.com-ն է՝ 84 միավորով: Անցած տարվա համեմատ՝ ծառայությունն իր դիրքերը բարելավել է 2 տոկոսով: ABCNews.com-ը հավաքել է 76 միավոր, NYTimes.com-ը՝ 74, HuffingtonPost.com-ը՝ 69 միավոր:
