Ընդդիմության կողմն անցած՝ Իրաքում Սիրիայի նախկին դեսպան Նաուաֆ Ֆարիսը BBC-ին տված հարցազրույցում հայտարարել է, երկրում իշխող վարչակարգը պատրաստ է քիմիական զենք կիրառել, եթե հայտնվի անելանելի վիճակում:
Ֆարիսի խոսքերով՝ Սիրիայի տարբեր քաղաքներում ռումբերի պայթյուններն իրականցվել են իշխող վարչակարգի և «Ալ-Քաիդա»-ի զինյալների հետ համատեղ:
Նախկին դեսպանը նաև կարծիք է հայտնել, որ նախագահ Ասադը իշխանությունից խաղաղությամբ չի հրաժարվի: Նա ենթադրւմ է, որ Ասադը իշխանությունը կպահի մինչև վերջին պահը, «եթե անգամ դրա համար ստիպված լինի զոհել ողջ Սիրիայի ժողովրդին»:
Սիրիայում հակամարտության մոտ մեկուկես տարիների ընթացքում ֆարիսը Ասադից հեռացած ամենաբարձրաստիճան պաշտոնյան է: Նա բարձր պաշտոններ է զբաղեցրել իշխող «Բաաս» կուսակցությունում, Սիրիայի անվտանգության մարմիններում, եղել է Սիրիայի տարբեր մարզերի նահանգապետ:
Այնուամենայնիվ, ֆարիսը նշել է, որ Սիրիայի վարչակարգը «անպայման կտապալվի»:
«Ես համոզված եմ, որ կառավարությունը շուտով կտապալվի: Ես հույս ունեմ, որ դա տեղի կունենա հնարավորինս արագ՝ զոհերի թիվը չավելացնելու համար»,- ենթադրում է Ֆարիսը:
Պատասխանելով այն հարցին, թե արդյոք կարո՞ղ է Ասադը քիմիական զենք կիրառել ընդդիմության դեմ, Ֆարիսը նախագահին անվանել է «միանգամայն կայացած հանցագործ, որ նման է վիրավոր գայլի»:
«Տեղեկություն կա (չնայած չճշտված), որ քիմիական զենք արդեն կիրառվել է Հոմսում,- ասել է Ֆարիսը:- Ես համոզված եմ, որ եթե Բաշար Ալ-Ասադին պատին դեմ տան… նա կկիրառի այդ զենքը»:
