2012 թ. հունիսին օղու արտադրությունը Ռուսաստանում դարձել է ռեկորդային վերջին 10 տարվա կտրվածքով` կազմելով 9.61 մլն դալ (1 դալը հավասար է 10 լիտրի): Ինչպես գրում է РБК daily-ն, արտադրության բումի պատճառը 2012 թ. հուլիսի 1-ից օղու ակցիզի թանկացումն է:
Դրա պատճառով օղի թողարկող ընկերություններն աշխատել են առավելագույն հզորությամբ, որպեսզի պահուստները լցնեն մինչ հունիսի վերջը:
Համամատած 2011 թ. հունիսի հետ, օղու արտադրությունն աճել է 47 տոկոսով:
Օղու ամենամսյա թողարկումը 2012 թ. առաջին եռամսյակում կազմել է 5.6 մլն դալ: Ընդհանուր առմամբ` ալկոհոլի ռուսական արտադրողները 2012 թ. առաջին կիսամյակում արտադրել են 42.28 միլիոն դալ օղի, ինչը 17.3 տոկոսով ավելի է՝ 2011 թ. առաջին կեսի համեմատ:
Համաձայն «Ռոսստատի» տվյալների` 2012 թ. առաջին կեսին աճել է գրեթե բոլոր ալկոհոլային ըմպելիքների արտադրությունը: Այսպես` կոնյակի արտադրությունը աճել է 80.5 տոկոսով` մինչև 4.42 միլիոն դալ, իսկ 25 տոկոսից թունդ ըմպելիքների արտադրությունը` 50.3 տոկոսով` մինչև 483.6 հազար դալ:
2012 թ. հունիսին գինու ռուսական արտադրողները արտադրել են 6.83 մլն դալ արտադրանք, ինչը գրեթե կրկնակի գերազանցում է անցած տարվա 6-րդ ամսվա ցուցանիշը:
2012 թ. հուլիսի 1-ից Ռուսաստանում օղու ակցիզը թանկացել է 18.1 տոկոսով: Ակցիզների հերթական թանկացումը տեղի կունենա 2013 թ. հունվարի 1-ին: