Իրանական Mehr News գործակալության փոխանցմամբ՝ Իրանի նախագահ Մահմուդ Ահմադինեժադը տարրական դասարանի սովորողների համար նախատեսված նոր դասագրքերի շնորհանդեսի ժամանակ քննադատել է երկրում մի շարք կինոթատրոնների ու ռեստորանների փակումը.
«Դրանց փակման փոխարեն, ոստիկանությունը պետք է ժողովրդին ընտրության հնարավորություն ընձեռեր: Եթե դասագրքերում տեղեկատվություն լինի իրանական ազգային խոհանոցի, ազգային սովորույթների, ավանդույթների ու մշակույթի մասին, ապա ժողովուրդը կկարողանա կատարել իր ընտրությունները, և մենք էլ ականատես չենք լինի ռեստորանների, կինոթատրոնների փակմանը կամ էլ ոստիկանության որևէ ցուցադրական գործողության: Եթե բնակչության շրջանում իրականացվեն համապատասխան լուսավորչական աշխատանքներ, ապա նա կկատարի իր ընտրությունը»:
Հիշեցնենք, որ իրանական ոստիկանությունը կիրակի Թեհրանում ու այլ քաղաքներում իրականացրած իր գործողությունների ժամանակ ձերբակալել է ավելի քան 130 կանանց, որոնք շոգ եղանակի պատճառով հիջաբ (գլխաշոր) չէին կրում: Կանանց նարգիլե ծխել թույլ տալու պատճառով փակվել էր 79 սրճարան ու ռեստորան: