Բրոդվեյում «Սարդ մարդը» ներկայացման ցուցադրությունից ժամեր առաջ, որին պետք է ներկա գտնվեր նաև ԱՄՆ առաջին տիկին Միշել Օբաման` դուստրերի հետ, անծանոթ տղամարդը սպառնացել է պայթեցնել թատրոնի շենքը:
Ինչպես տեղեկացնում է The Daily Mail-ը, այդ պահին Միշել Օբաման 14-ամյա Մալիայի և 11-ամյա Սաշայի հետ ճանապարհին է եղել:
Գաղտնի ծառայությունները ուսումնասիրել են թատրոնի շենքը, սակայն այնտեղ ռումբ չեն հայտնաբերել:
New York Post-ի տեղեկություններով՝ տղամարդը մասնակցել է նույն ներկայացմանը, որին ներկա է գտնվել նաև նախագահի ընտանիքը:
«Եթե ներկայացումը լավը չլինի, ես կպայթեցնեմ թատրոնի շենքը»,- սպառնացել է տղամարդը: Հայտնի չէ` տղամարդուն կալանավորե՞լ են, թե՞ ոչ: Չի հաղորդվում նաև, թե տղամարդն իմացե՞լ է արդյոք, որ նույն ներկայացումը պատրաստվում էր դիտել նաև նախագահի ընտանիքը:
Սպառնալիքի բացակայության հաստատումից հետո նախագահի ընտանիքին թույլատրվել է դիտել ներկայացումը:
Ներկայացումը տեղի է ունեցել առանց հետաձգման կամ ընդհատման: Օբամաները ներկա են գտնվել ներկայացմանը:
Ավելի վաղ տեղեկացրել էինք, որ Վաշինգտոնի ոստիկանությունը հետաքննություն է սկսել՝ ստուգելու ԱՄՆ առաջին տիկնոջ դեմ նախապատրաստվող հնարավոր մահափորձի մասին տեղեկությունները։
Ըստ տեղեկությունների՝ հուլիսի 11-ին ծառայակիցների հետ զրույցի ժամանակ Բարաք Օբամայի շարասյան մոտոցիկլավարներից մեկը հայտարարել է, որ մտադիր է սպանել Միշել Օբամային։ Դրանից հետո նա, իբր, ծառայակիցներին ցուցադրել է այն զենքի լուսանկարը, որով ցանկանում է իրականացնել այդ սպանությունը։
