Աշխարհում խոշորագույն Facebook սոցիալական ցանցին մեղադրում են երիտասարդ օգտատերերին խաղամոլ դարձնելու մեջ: Պատճառը ցանցի «լասվեգասյան խաղատների ոճով» խաղերն են:
Երեխաներն օգտագործում են վիրտուալ մետաղադրամները՝ հասնելու ջեքփոթին: Նրանք իրենց ամբողջ ժամանակն անցկացնում են պտուտակախաղերի և սլոթ-մեքենաների խաղերի վրա՝ չհեռանալով համակարգիչներից կամ մի կողմ չդնելով բջջային հեռախոսները:
Ներկայում Facebook-ում հարյուրավոր վիրտուալ սլոթ-մեքենաներ և պոկերային խաղեր կան, որոնց թվում են Jackpotjoy-ը, Slotomania-ն և DoubleDownCasino-ն:
The Daily Mail-ի փոխանցմամբ՝ հանրահայտ FarmVille խաղի մշակող Zynga ընկերությունն ապահովում է Facebook-ի եկամուտների 12 տոկոսը: Մասնագետների փոխանցմամբ՝ խաղերը երիտասարդներին ստիպում են մտածել, որ խաղամոլությունը անվնաս զվարճանք է:
Facebook-ը Միացյալ Թագավորությունում ունի 13-17 տարեկան 3 միլիոն օգտատեր: 13 տարեկանը նվազագույն տարիքն է ցանցում գրանցվելու համար: Եվս մեկ միլիոն օգտատեր 13-ից ցածր տարիքի են, որոնք ձևանում են իբրև մեծ:
Սելֆորդի համալսարանի պոֆեսոր Քերոլայն Դաունսը երիտասարդների կախվածության մասին անհանգստություն է հայտնել, երբ նրա 13-ամյա դուստրը վշտացել էր Fluff Friends խաղում վիրտուալ գումար կորցնելու համար: Նրա խոսքով՝ երիտասարդ տարիքից նրանց մոտ կախվածություն է առաջանում խաղերի նկատմամբ: Չնայած խաղերն անվճար են, սակայն շատերը գումարներ են ներդնում՝ ջեքփոթների բարձրացման համար:
Բրիտանիայում օրենքը թույլ է տալիս ազարտային խաղերից օգտվել 18 տարեկանից, սակայն խաղամոլության մասին օրենքն ընդունվել է 2005 թվականին՝ մինչ սոցիալական խաղամոլության աճը:
Facebook-ի տնօրենները հանդիպումներ են անցկացնում խաղային ընկերությունների հետ խաղային լիցենզիաներ տրամադրելու նպատակով:
Բրիտանական Betable ընկերությունն էլ խաղերի ամերիկյան մշակողների հետ բանակցում է Facebook-ի հայտնի խաղերը իրական գումարով խաղալու հնարավորության հարցի շուրջ:
