Հայաստանում և Վրաստանում վերջին օրերին անցկացված միջուկային անվտանգության վարժանքները, որոնք կազմակերպել են ԱՄՆ-ն ու Եվրամիությունը, ամերիկացիների կողմից թելադրված են և ուղղված Իրանի դեմ: «Առաջին լրատվական»-ի հետ զրույցում նման տեսակետ հայտնեց քաղաքագետ Սերգեյ Շաքարյանցը:
«Եթե նմանատիպ զորավարժություններ առաջարկվեին Ռուսաստանի կողմից, ապա դա զարմանք չէր հարուցի, այն պատճառով, որ Ռուսաստանը տասնապատիկ անգամ ավելի շատ է կապված Հայկական ԱԷԿ-ի հետ և այնուամենայնիվ պատասխանատվություն կրում է միջուկային անվտանգության համար: Բացի դրանից, Հայաստանը հանդիսանում է միջուկային միջազգային կենտրոնի անդամ, որը գտնվում է Ռուսաստանում: Բայց տվյալ դեպքում, երբ այդ զորավարժությունները իբր թե դառնում են Հայաստանի և Վրաստանի գործ ու դրան մասնակից են լինում ԱՄՆ-ն ու Եվրահանձնաժողովը, դա արդեն կասկածանքներ է առաջացնում, երկրորդն էլ համոզում է, որ իրոք այդ զորավարժությունները կրում են հակաիրանական բնույթ»,- ասաց քաղաքագետը:
Սերգեյ Շաքարյանցի խոսքով՝ Հայաստանը, որպես ատոմային էներգետիկայի ոլորտ ունեցող երկիր, անշուշտ պարտադիր պետք է զբաղվի միջուկային անվտանգության հարցերով, բայց այստեղ կասկած է հարուցում այն փաստը, որ նախաձեռնողը ԱՄՆ-ն ու Եվրահանձնաժողովն են ու դրանց մասնակից են ոչ թե Ռուսաստանը կամ Ատոմային էներգետիկայի միջազգային գործակալությունը (ՄԱԳԱՏԷ), այլ Վրաստանը: Հարցին, թե դա այս փուլում ի՞նչ վտանգ է ներկայացնում Հայաստանի համար, քաղաքագետը պատասխանեց. «Ցանկացած նախաձեռնություն, որը թեկուզև թեթևակի կապված կլինի որևէ հակաիրանական ծրագրի հետ, դա վտանգ է: Նախևառաջ դա վտանգում է մեր հայ-իրանական հարաբերությունները: Երկրորդը՝ իրանական կողմը կարող է յուրովի մեկնաբանել դա: Մենք չպետք է անտեսենք մեր մոտիկ և ամենաբարիդրացիական հարևանի իրավունքը»:
Շաքարյանցը նաև նշեց, որ հայկական կողմը կարող էր հրաժարվել ԱՄՆ պարտադրանքով անցկացված վարժանքներից, սակայն չի արել դա: «Շատ էլ հեշտ կարող էինք ասել, որ՝ դա ձեզ չի վերաբերում, այդ հարցերում պատասխանատու են Հայաստանը և Ռուսաստանի Դաշնությունը, գումարած ՄԱԳԱՏԷ-ն: Կարող էինք, ուղղակի չենք արել»,- ընդգծեց նա:
Ինչ վերաբերում է այս փուլում Վրաստանի արտգործնախարարի այցելությանը Հայաստան, քաղաքագետը դա երկու երկրների հարաբերությունների զարգացման առումով դրական է համարում: Ըստ նրա՝ չպետք է մոռանալ, որ մենք ունենք ջավախահայության խնդիր, ինչը հնարավոր չէ լուծել, եթե մեր երկու երկրների միջև չլինեն բարիդրացիական հարաբերություններ: