Իրանի իշխանությունները տարածաշրջանային հարևանների հետ պատրաստ են օգնել Սրիային՝ լուծելու քաղաքացիական ճգնաժամը: Այս մասին հայտարարել է Իրանի ԱԳՆ ներկայացուցիչ Ռամին Մեհմանփարսատը:
«Իրանը պատրաստ է որոշակի դեր խաղալ, որպեսզի Սիրիայում անվտանգություն և կայունություն հաստատվի և միևնույն ժամանակ կանխել ճգնաժամի տարածումն ամբողջ տարածաշրջանի վրա»,- ասել է նա:
Դիվանագետը նշել է, որ իրավիճակը երկրում վատանում է, քանի որ մի շարք արևմտյան և արաբական պետություններ զինում են սիրիական ընդդիմությանը:
«Այդ պետությունները կարող էին կառավարության և ընդդիմության միջև քաղաքական երկխոսության անցկացման պայմաններ ստեղծել` փոխարենն արհեստականորեն հակամարտությանն աջակցելուն և Սիրիային քաղաքացիական պատերազմի դրդելուն»,- նշել է Իրանի ներկայացուցիչը:
Ավելի վաղ պաշտոնական Թեհրանը բազմիցս առաջարկել էր իր օգնությունը Սիրիայում իրավիճակի կարգավորման համար, սակայն այն մերժվել էր ինչպես սիրիական ընդդիմության, այնպես էլ արևմտյան մի շարք պետությունների կողմից, որոնք կարծում են, որ Իրանը սատարում է Սիրիայի նախագահ Բաշար ալ-Ասադի վարչակարգին:
