Грузия Online-ի փոխանցմամբ՝ ռուսական Эхо Москвы ռադիոկայանին տված հարցազրույցում Վրաստանի ԱԳ նախարար Գրիգոլ Վաշաձեն անդրադարձել է Աֆղանստանում Վրաստանի խաղաղապահ առաքելությանը.
«Վրաստանը մտադիր է Աֆղանստանում ունեցած զինվորական կոնտինգենտը 900-ից հասցնել մինչև 1700 զինծառայողի: 2014 թվականին Աֆղանստանից դուրս են բերվելու բոլոր զորքերը, այդ թվում՝ նաև վրացական զորքերը: Բայց քանի դեռ դա տեղի չի ունեցել, Վրաստանը ISAF-ի առաքելությանը մասնակցելու է՝ ելնելով in together (միասին ներս) և out together (միասին դուրս) սկզբունքներից:
Աֆղանական առաքելությունում Վրաստանի մասնակցությունը պայմանավորված է նրանով, որ դա անհրաժեշտ է միջազգային կոալիցիային, որովհետև այն անհրաժեշտ է բոլոր հարակից երկրներին, որպեսզի Աֆղանստանը չվերածվի ահաբեկչության ու թմրանյութերի և այլնի բուծարանի:
Մենք այդ որոշումը կայացրել ենք անձամբ՝ առանց որևէ ճնշման ու խնդրանքի: Որովհետև, ինչպես հասկանում եք, Վրաստանն Աֆղանստանին շատ ավելի մոտ է գտնվում, քան Հոլանդիան: Իսկ մեզ չի կարող չհետաքրքրել Աֆղանստանի անվտանգության, կայունության, ժողովրդավարական զարգացման հարցը, որովհետև լայն իմաստով մինչև Մերձավոր Արևելք մեր մեծ տարածաշրջանն է:
Ռուսաստանը պետք է շնորհակալություն հայտնի Վրաստանին՝ Աֆղանստանում առաքելությանը մասնակցելու համար, քանի որ երբ կոալիցիան դուրս գա Աֆղանստանից, շատ ավելի հետաքրքիր կլինի հետևել, թե ինչպես են զարգանում իրադարձությունները և ինչպես է Ռուսաստանն ապահովում իր հարավային բնագծերի անվտանգությունը»:
Հիշեցնենք, որ եթե Աֆղանստանում խաղաղապահների թվաքանակը հասցվի 1700-ի, ապա Վրաստանը Աֆղանստանում ունեցած զինվորական կոնտինգենտի ցուցանիշով կդառնա ՆԱՏՕ-ի անդամ չհանդիսացող երկրների թվում առաջատար:
