Այս տարի խաղողի բերքը բավականին լավ է, սնկային հիվանդություններ չեն զարգացել, բերքի կորուստներ չկան, կարկտից տուժած տարածությունները քիչ են: Այս մասին «Առաջին լրատվական»-ի հետ զրույցում հայտնեց Խաղողապտղագինեգործության գիտական կենտրոնի մասնագետ Դերենիկ Սաֆարյանը` նշելով, որ անցած տարվա չափ կամ մոտ 10%-ով ավելի բերք է սպասվում:
Սակայն նրա խոսքով՝ գյուղացիներն այս տարի մի ուրիշ մեծ խնդիր ունեն`ոռոգման ջուրը. «Բավականին տհաճ երևույթներ են առաջացել, 1 հեկտարի հաշվով ոռոգման համար նախկինից բարձր նորմաներ են սահմանել և դրա արդյունքում ջրի վարձը շատ բարձր է ստացվում»: Հաշվիչներ էլ չկան, որ գյուղացին վստահ լինի, թե ինչքան ջուր է ստացել իր վճարածի դիմաց: Խաղողի համար ոռոգման նորմատիվը 7-8 հզ. խորանարդ մետրից դարձել է 10-12 հզ. խորանարդ մետր:
Դ.Սաֆարյանը տեղեկացրեց, որ ոռոգման նորմաները դեռ 1968թ-ին նախարարությունների կոլեգիալ նիստում հաստատված էին, իսկ հիմա «ամեն մեկը մի ինքնագործությամբ փորձում է ապացուցել, թե իբրև բույսերն ավելի շատ ջրի կարիք ունեն», ջուրն էլ չեն տալիս հողամասի մոտ, և մինչև ավել ճանապարհ անցնելը ջրի արտանորմային կորուստներ են լինում:
Ընդ որում` Արարատյան դաշտավայրում խաղողին անհրաժեշտ է մոտ 5 անգամ ոռոգել, նախալեռնային շրջաններում՝ 6-7 անգամ, հյուսիսային շրջաններում՝ 3-4 անգամ:
