Ինչպես և սպասվում էր, «Հարսնաքար»-ի գործով ԱԺ արտահերթ նստաշրջան հրավիրելու համար 44 ստորագրություն չհավաքվեց: Հայ ազգային կոնգրեսի խորհրդարանական խմբացությունը 24 ժամվա ընթացքում նպատակ ուներ հավաքելու վերոնշյալ ստորագրությունները, որպեսզի հնարավոր լիներ արտահերթ նստաշրջան գումարել: Բայց ինչպես պարզվեց երեկ՝ երեկոյան, հավաքվել էր ընդամենը 21 ստորագրություն: Դա այն դեպքում, երբ ստորագարահավաքին միանալու մասին հայտարարել էին ՀԱԿ-ի, ՀՅԴ-ի, Ժառանգության և ԲՀԿ-ի պատգամավորները: Սակայն ստորագրահավաքին միանալուն զուգահեռ ԲՀԿ-ն նախազգուշացել էր խորհրդարանական ընդդիմությանը, որպեսզի իրենց վրա հույս չդնեն, քանի որ այս կուսակցության պատգամավորների մեծամասնությունը երկրից բացակայում է և չի կարող ստորագրել: Իսկ եթե ԲՀԿ-ն չստորագրեր, պարզ էր, որ նախաձեռնությունը տապալվելու էր: Այս մասին քաջ գիտակցում էր նաև նախաձեռնության հեղինակ խորհրդարանական ընդդիմությունը:
Պարզվեց, որ ԲՀԿ 37 պատգամավորներից ստորագրել են ընդամենը 7-ը: Միայն ՀԱԿ խմբակցության պատգամավորներն են ամբողջ 7 հոգանոց կազմով ստորագրել ձևաթուղթը, ՀՅԴ-ից ստորագրել է 3, «Ժառանգությունից»՝ 4 պատգամավոր: Ժառանգության պատգամավորներից չի ստորագրել Րաֆֆի Հովհաննիսյանը: Չի ստորագրել նաև ԲՀԿ առաջնորդ Գագիկ Ծառուկյանը: ԲՀԿ պատգամավոր Տիգրան Ուրիխանյանը մեզ հետ զրույցում նշեց, որ Ծառուկյանը ոչ պակաս կարևոր գործերով բացակայում է երկրից:
Ավելի վաղ Տիգրան Ուրիխանյանը մեզ ասել էր, որ «Հարսնաքար»-ի հարցով ԱԺ արտահերթ նիստ գումարելու նախաձեռնության շրջանակներում իրենք գործում են իրենց խղճի և բարոյականության շրջանակներում: Հետաքրքրվեցինք՝ արդյո՞ք ձևաթուղթը չստորագրած պատգամավորները զուրկ են խղճից ու բարոյականությունից:
«Քանի որ չկա հարցի վերաբերյալ խմբակցության ներսում քննարկում, խմբակցության որոշում, յուրաքանչյուրն իր համոզմունքների և ցանկությունների շրջանակում է միացել ստորագրահավաքին: Այդ թիվն ավելի մեծ կլիներ, եթե մեր կուսակցության բոլոր անդամները Հայաստանում լինեին»,- ասաց նա:
ԲՀԿ անդամն ուշադրություն հրավիրեց մի հանգամանքի վրա: Ըստ նրա՝ եթե անգամ 44 ստորագրությունը հավաքվեր, միևնույն է, արտահերթ նիստի ժամանակ քվորում չէր ապահովվի:
«Ինչո՞ւ իրենք չեն շեշտադրում, որ քվորում չէր ապահովվելու: Երկուշաբթի օրվանից խորհրդարանը պաշտոնապես գնում է արձակուրդ: Միևնույն է, արդյունքի չէին հասնի նախաձեռնողները: Եթե այդպես է, ի՞նչն էր նախաձեռնության պատճառը»,- հարցադրում արեց նա:
Այն, որ վերոնշյալ 44 ստորագրությունները չէին հավաքվելու, հայտնի էր դեռևս նախաձեռնության սկզբում: Եվ դժվար թե նախաձեռնության հեղինակները չէին գիտակցում այդ ամենը: Ուստի մեծ ակնկալիքներ ունենալ և աղմուկ բարձրացնել այն փուլում, երբ ԲՀԿ-ն նախօրոք հայտարարում է, որ պատգամավորների ամբողջ կազմով չի կարող մասնակցել ստորագրահավաքին, իսկ խորհրդարանի կազմը արձակուրդի է մեկնում, այնքան էլ լուրջ չէ: Ավելի լավ կլիներ, եթե խորհրդարանական ընդդիմությունը մեկ անձի դեմ ուղղված պայքարը վերածեր ավելի կարևոր նախաձեռնության՝ օլիգարխիայի և նրանց թիկնապահների դեմ պայքարելու համար հստակ նախաձեռնությամբ հանդես գար, և պայքարը լիներ համակարգային, նշանակություն չունենար, թե որ կուսակցության անդամ են այդ օլիգարխները:
Լուսանկարը՝ PanARMENIANPhoto-ի
