Եմենի նախագահ Ալի Աբդալլահ Սալեհը հետաձգել է պաշտոնական այցը Վաշինգտոն, որը նախատեսված էր փետրվարի վերջին: Այս մասին փոխանցում է երկրի նախագահի մամուլի ծառայությունը: Պատճառը պաշտոնապես չի նշվում, սակայն դա հավանաբար պայմանավորված է երկրի տարբեր քաղաքներում սկսված բողոքի ակցիաներով, որոնք պահանջում են երկրի ղեկավարության հրաժարականը:
Եմենում բողոքի ցույցերը սկսվեցին այն ժամանակ, երբ Թունիսում և Եգիպտոսում փողոց դուրս եկան հազարավոր մարդիկ` պահանջելով այդ երկրների ղեկավարների հրաժարականը: Հատկապես դրանք ավելի մասսայական դարձան Թունիսի հեղափոխությունից հետո: Եգիպտոսի դեպքերի զարգացմանը զուգընթաց, Եմենի ղեկավարությունը փորձում էր մեղմել բողոքի ակցիաները: Երկրի նախագահի պաշտոնը 33 տարի զբաղեցնող Սալեհը Մուբարաքի օրինակով հայտարարեց, որ չի պատրաստվում առաջադրվել 2013 թթ. նախագահական ընտրությունների ժամանակ, ինչպես նաև այդ գահը ժառանգել որդիներից մեկին:
Սակայն երեկվա դեպքերը ցույց են տալիս, որ եմենցիների համար դա բավարար չէ: Նրանք հազարներով փողոց են դուրս եկել, և ոստիկանությունը ստիպված է եղել մարդկանց ցրելու համար օգտագործել հատուկ միջոցներ: Երկրի ընդդիմությունը հայտարարել է, որ ամեն հինգշաբթի կազմակերպելու են «ցասման օր», քանի դեռ Սալեհը չի հեռացել իր պաշտոնից: Սալեհի ամերիկյան այցը կարող է հետաձգված լինել նաև հենց Վաշինգտոնի կողմից, որն այս իրավիճակում չի կարող ընդունել դիկտատորի համբավ ունեցող մերձավորարևելյան առաջնորդին: Առանց այն էլ Օբամայի վարչակազմը սուր քննադատության է ենթարկվում տեղի էլիտաների և ժողովուրդների կողմից մերձավորարևելյան զարգացումներին համարժեք պատասխան չտալու համար:
Այս մասին հաղորդում է BBC-ն:
