Երեկ ՀՀ մարդու իրավունքների գրասենյակի նախաձեռնությամբ քննարկվում էր ԱԺ-ում առաջին ընթերցմամբ անցած օրինագիծը, որով նախատեսվում էր Սևանա լճից ջրի բացթողնման տարեկան առավելագույն չափաքանակ uահմանել մինչև 320 մլն խորանարդ մետրը:
Քննարկմանը մասնցել են բոլոր պատասխանատու և շահագրգիռ կողմերը: Քննարկման ընթացքում մի հետաքրքրական փաստ է ի հայտ եկել: Հասարակության համար բացարձակապես անսպասելի է եղել Ջրային տնտեսության պետական կոմիտեի ֆինանսատնտեսագիտական վարչության պետ Մհեր Մկրտումյանի պնդումն այն մասին, որ խորհրդարանը հունիսի 22-ին արդեն իսկ ընդունել է Սևանա լճից լրացուցիչ ջրառի վերաբերյալ օրենքի նախագիծը, այն դեպքում, երբ բնապահպանական կազմակերպությունները սպասում էին օրենքի երկրորդ ընթերցմանը համապաստախան քայլեր իրականացնելու համար:
Այս մասին «Առաջին լրատվական»-ի հետ զրույցում տեղեկացրեց «Էկոլուր» բնապահպանական դաշինքի համակարգող Սիլվա Ադամյանը, ով ևս ներկա է եղել հանդիպմանը: Նա փաստեց, որ օրենքի շուտափույթ ընդունումը պարզաբանել են, ասելով, որ խնդիրը շատ հրատապ է եղել, և գյուղացիները ոռոգում են պահանջել, ուստի ստիպված են եղել ոռոգման ջրի հարցը լուծել:
«Օրինագծի առաջին ընթերցմանը մասնակից չդարձրին մեզ, պարզվեց, որ երկրորդ ընթերցում չի լինելու:
Առանց հասարակության կարծիքը հաշվի առնելու, առանց երկրորդ ընթերցումն անցկացնելու՝ օրենք են ընդունել: Ի պատասխան` մենք իրենց ասացինք, թե մի՞թե Սևանա լճի խնդիրն այնքան փոքր է, որ ինքնագլուխ նման լուրջ որոշումներ են կայացնում: Ասել ենք, որ դա օրենքի խախտում է»,- մանրամասնեց Սիլվա Ադամյանը` շարունակելով, որ այսօր բնապահպանները սպասում են, որ օմբուդսմենը արձագանքի այս խնդրին, որից հետո պարզ կդառնան իրենց քայլերը:
Հիշեցնենք, որ ՀՀ ԱԺ գյուղատնտեսական և բնապահպանական հարցերի մշտական հանձնաժողովը հունիսի 20-ի նիստում «Սևանա լճի մասին ՀՀ օրենքում լրացում կատարելու մասին» և «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» ՀՀ օրենքների նախագծերի վերաբերյալ տվեց դրական եզրակացություն, որից հետո օրինագիծն առաջին ընթերցմամբ ընդունվեց Օրենսդրական փոփոխությունների այս փաթեթով կառավարությունն առաջարկում է 2012 թվականին Սևանա լճից ջրի բացթողնման տարեկան առավելագույն չափաքանակ uահմանել մինչև 320 մլն խորանարդ մետրը՝ 150 միլիոն խորանարդ մետրով ավելացնելով օրենքով սահմանված ծավալը:
