Հայաստանում տեղի ունեցող քաղաքական գործընթացները որևէ կապ և նմանություն չունեն արաբական աշխարհում տեղի ունեցող իրադարձությունների հետ: Այսօր տեղի ունեցած մամուլի ասուլիսի ժամանակ այս մասին ասաց «Կովկաս» ինստիտուտի տնօրեն Ալեքսանդր Իսկանդարյանը:
Անդրադառնալով սոցիալական ցանցերի, մասնավորապես Facebook-ի՝ քաղաքական զարգացումների վրա ունեցած ազդեցությանը՝ նա նկատեց, որ որևէ երկրում, այդ թվում՝ Հայաստանում, սոցիալական ցանցերն իրենք իրենցով չեն կարող էական, լուրջ գործընթացների սկիզբ դնել, դրանց շարժիչ ուժ հանդիսանալ:
«Սոցիալական ցանցերն ընդամենը տեխնիկական միջոց են, ինչ-որ բան սկսելու համար անհրաժեշտ գործիք: Առավել իրական շարժիչ ուժը Հայաստանում երիտասարդությունն է»,- ասաց քաղաքագետը:
Նրա խոսքով՝ վերջին տարիներին Հայաստանում լիբերալ քաղաքական ուժերի կողքին ձևավորվում են նաև ձախ ուժեր: «Ընդ որում, ՀՅԴ-ն այսօրվա դրությամբ իրական ձախ ուժ չէ, այլ ընդամենը ամենապահպանողականը:
Բացի այդ, երբ քաղաքական գործընթացներն առաջ մղեն բարձր մակարդակ և որոշակի կրթական ցենզ ունեցող մարդիկ, այլ ոչ՝ դզող-փչողները, վաճառողուհիներն ու թոշակառուները, քաղաքական գործընթացներն այլ ընթացք կստանան»,- համոզմունք հայտնեց Իսկանդարյանը:
Ամփոփելով՝ «Կովկաս» ինստիտուտի տնօրենն անդրադարձավ նաև ՀՀԿ-ական պատգամավոր Ռուբեն Հայրապետյանին պատկանող «Հարսնաքար» ռեստորանում տեղի ունեցած հայտնի միջադեպին՝ նկատելով, որ կատարվածի հանդեպ համարժեք վերաբերմունք եղավ ինչպես հասարակության, այնպես էլ իշխանությունների կողմից. «Իշխանություններն սկզբում աշխատեցին հանդարտեցնել իրավիճակը, սակայն հետո՝ տեսնելով, որ անկարող են, ստիպված ընթացք տվեցին գործին»:
