Հայ ազգային կոնգրեսը (ՀԱԿ) խրախուսում է, որ գալիք տարի անցկացվելիք նախագահական ընտրություններին ընդդիմադիր քաղաքական ուժերը հանդես գան միասնական թեկնածուով։ «Ազատություն» ռադիոկայանի հետ զրույցում նման հայտարարություն է արել Կոնգրեսի համակարգող և խորհրդարանական խմբակցության ղեկավար Լևոն Զուրաբյանը։
Ընդգծելով, որ իրենց համար ամենակարևոր խնդիրն է Հայաստանում ժողովրդավարության հաղթանակը և «ռեժիմից» ազատվելը, Զուրաբյանը շարունակել է. – «Ահա մեզ պետք է այնպիսի թեկնածու, որը կարողանա մարտահրավեր նետել Սերժ Սարգսյանի ռեժիմին։ Դա պետք է լինի մարդ, որը, մի կողմից, ունի ամենամեծ կոնսոլիդացիոն հնարավորությունը, համախմբման հնարավորությունը, այսինքն` մի մարդ, որի հեղինակությունը այնքան հզոր է, այնքան անհերքելի է, որ նրա շուրջ կհավաքվեն առավելագույն քանակով քաղաքական ուժերը, մյուս կողմից` դա լինի մի մարդ, որը անկաշառ է, ռեժիմի հետ որևէ գործարքի չի գնա և վճռական կլինի մինչև վերջ։ Հասարակությունը թող դատի` ով կարող է լինել այդ մարդը»։
Երեքշաբթի օրը լրագրողների հետ հանդիպման ժամանակ ՀՅ Դաշնակցության Հայաստանի գերագույն մարմնի ներկայացուցիչ, կուսակցության խորհրդարանական խմբակցության ղեկավար Արմեն Ռուստամյանը ասել է, թե Դաշնակցությունը հնարավոր է համարում, որ հաջորդ տարի անցկացվելիք նախագահական ընտրություններին ընդդիմադիր քաղաքական ուժերը հանդես գան միասնական թեկնածուով։
Իսկ թե առաջիկայում տվյալ հարցով քննարկումներ կամ բանակցություններ ընթանալու են արդյոք ընդդիմադիր կամ ոչ կոալիցիոն մյուս քաղաքական ուժերի հետ` այս կապակցությամբ Հայ ազգային կոնգրեսի խորհրդարանական խմբակցության ղեկավարը ասել է. – «Դեռևս որևէ խոսակցություն դրա մասին չի եղել, նման բանակցություն այս պահին չկա, ոչ էլ նման բանակցություն պլանավորված է։ Բայց ես չեմ բացառում, որ քաղաքական զարգացումները կարող են բերել նման բանակցությունների»։
