Լոնդոնի ոստիկանությունը ձերբակալել է Tetra Pak ընկերության ժառանգորդ, միլիարդատեր Հանս Քրիստիան Ռաուսինգին՝ կապված նրա կնոջ մահվան հետ,- հաղորդում է The Daily Telegraph-ը: Եվա Ռաուսինգի մահվան պատճառն առայժմ հայտնի չէ:
Ռաուսինգը ձերբակալվել էր դեռ երկուշաբթի անզգույշ մեքենա վարելու համար, նրա մոտ հայտնաբերվել էին ծանր թմրանյութեր: Դրանից հետո ոստիկանությունը խուզարկություն է անցկացրել նրա տանը՝ Լոնդոնի Բելգրավիա շրջանում, որի ժամանակ հայտնաբերվել է նրա կնոջ մարմինը:
Հենց սկզբից Եվա Ռաուսինգի մահն ավանում էին «անբացատրելի»: Այնուամենայնիվ, ոստիկանությունը վերաորակավորել է նրա ամուսնու ձերբակալության պատճառը՝ հայտարարելով, որ նա կալանքի տակ է պահվում կնոջ մահվան պատճառով: Դրանից հետո նրան տեղափոխել են հիվանդանոց, սակայն թե կոնկրետ ինչ բուժում է նա ստանում՝ չի հաղորդվում:
Պարբերականը գրում է, որ ամուսինները երկար ժամանակ բուժվում էին թմրանյութերի կախվածությունից: Նրանք ծանոթացել են 1990-ականներին հենց վերականգնողական կուրսերի ժամանակ:
Հանս Քրիստիանը Tetra Pak ընկերության հիմնադրի՝ շվեդ Հանս Ռաուսինգի որդին է: Ընկերություն կառավարելու գործում մասնակցությունից նա հրաժարվել էր՝ նախընտրելով ճանապարհորդել: Վերականգնողական կուրսերից, ամուսնությունից և Լոնդոն տեղափոխվելուց հետո Հանս Քրիստիանը կնոջ հետ սկսել է զբաղվել բարեգործությամբ: Մասնավորապես նրանք միլիոնավոր դոլարներ են հանգանակել թմրամոլներին օգնող կազմակերպություններին:
2008 թ. ամուսինները ձերբակալվել են ծանր թմրանյութեր պահելու համար: Մասնավորապես հաղորդվում էր, որ Եվա Ռաուսինգը փորձել է դրանք ընդունել ամերիկյան դեսպանատանը: