ԵՊԼՀ կարմիր վկայագրերի (դիպլոմների) արժանացած շրջանավարտներն այսօր պետք է ստանային իրենց դիպլոմները Երևանի օպերայի և բալետի ազգային ակադեմիական թատրոնի բեմում համերգային ծրագրի շրջանակում: Սակայն, ինչպես «Առաջին լրատվական»-ի հետ զրույցում տեղեկացրեց ԵՊԼՀ կարմիր դիպլոմակիր Արմենուհի Ղազարյանը, այլ բան է պարզվել:
Ըստ ԵՊԼՀ շրջանավարտի՝ բազմաթիվ ուսանողներ տարբեր մարզերից եկել, հասել են քաղաք՝ իրենց դիպլոմները ստանալու, երբ պարզ է դարձել, որ անհայտ պայմաններում ընտրվել են 20 դիպլոմակիրներ, և միայն նրանք են ստանալու իրենց դիպլոմները, ըստ նախատեսվածի՝ բեմի վրա, իսկ մնացած ուսանողները այստեղ են միայն համերգային ծրագրին ականատես դառնալու համար:
«Ուսանողները մտածում են, որ դա արհամարհանք է, որովհետև կամզակերպիչներն ասում են, որ ուսանողների այդ ցուցակն ընտրվել է ըստ գնահատականների և ուսման բարձր ցուցանիշների, սակայն կան ավելի լավ առաջադիմություն ցուցաբերած շրջանավարտներ, որոնք այսօր չեն ստանա կարմիր դիպլոմ: Մնացածը երևի կստանան երկու օր հետո կապույտ դիպլոմ ստացող շրջանավարտների հետ»,- նշեց Արմենուհի Ղազարյանը՝ շարունակելով, որ այս պահին շուրջ 15 ուսանող բողոքում է, որ հավուր պատշաճի չի ստանալու կարմիր դիպլոմ:
