Ադրբեջանական Trend լրատվական գործակալության փոխանցմամբ՝ Թուրքիայի էներգոշուկայի կարգավորման մարմինը (EPDK) մասնավոր սեկտորին թույլատրել է Ռուսաստանից ներկրել 6 միլիարդ խորանարդ մետր գազ: Այդ գազի ներկրումը մեկնարկելու է 2013 թվականի հունվարի 1-ից և իրականացվելու է «Արևմտյան երթուղով»:
EPDK-ն մասնավոր սեկտորի դիմումներն ընդունելու է մինչև 2012 թվականի օգոստոսի 10-ը: Այն ընկերությունը, որը EPDK-ից կստանա գազի ներկրման թույլտվություն, պետք է համաձայնագիր ստորագրի ռուսական «Գազպրոմի» հետ:
Թուրքական «Բոթաշ» և ռուսական «Գազպրոմ» ընկերությունների միջև ավելի վաղ ստորագրված գազի ներկրման համաձայնագիրն ավարտվելու է 2012 թվականի սեպտեմբերին:
Հիշեցնենք, որ հունիսի 19-ին Թուրքիայի էներգետիկայի և բնական պաշարների նախարարությունը EPDK-ի հետ մշակել էր մի օրինագիծ, ըստ որի՝ երկրի մասնավոր սեկտորին հնարավորություն է ընձեռվում բնական գազ ներկրել Թուրքիա:
Օրինագծի համաձայն՝ Թուրքիայի մասնավոր սեկտորին թույլատրվում է գազ ներկրել այն երկրներից, որոնց հետ Թուրքիան արդեն իսկ ունի կնքած գազային համաձայնագրեր: 2011 թվականին Թուրքիան ներկրել է 39.7 միլիարդ խորանարդ մետր:
