Google ընկերությունը պատրաստվում է պայքարել ամբողջ աշխարհում սեռական փոքրամասնությունների իրավունքների համար՝ սկսելով Legalize love («Օրինականացրեք սերը») կարգախոսով արշավ:
Ինչպես հաղորդում է Mashable տեխնոբլոգը, դրա նպատակն է պաշտպանել ԼԳԲՏ-հանրության իրավունքները հատկապես այն երկրներում, որտեղ նրանք ճնշումների են ենթարկվում պաշտոնական մակարդակով:
IT-հսկան կպաշտպանի ԼԳԲՏ-հանրության իրավունքները միայն այն երկրներում, որտեղ կորպորացիան գրասենյակներ ունի: Հատուկ ուշադրություն կդարձվի այն պետություններին, որոնցում գոյություն ունի հոմոֆոբ մշակույթ կամ օրենսդրություն:
Իր գործունեությունը Google-ը կսկսի Սինգապուրից։
Ընկերության ղեկավարության ներկայացուցիչ Մարկ Պալմեր- Էդդժեկամբը, ելույթ ունենալով Լոնդոնում Global LGBT Workplace գագաթնաժողովում, հայտարարել է. «Մենք ցանկանում ենք, որպեսզի մեր գեյ, լեսբուհի կամ տրանսգենդեր աշխատակիցները գրասենյակի սահմաններից դուրս կարողանան իրենց նկատմամբ ակնկալել նույն վերաբերմունքը, ինչ նրա սահմաններում: Դա մեր խոշոր և հավակնոտ նախագիծն է»:
Նշենք, որ սա Google-ի առաջին քայլը չէ սեռական փոքրամասնությունների իրավունքները պաշտպանելու ուղղությամբ: Օրինակ՝ երբ Կալիֆոռնիա նահանգում ընդունվեց միասեռ ամուսնություններն արգելող օրենք, կորպորացիան ԶԼՄ-ներում բողոքի արշավ սկսեց:
