Երեկ Ռումինիայի Սահմանադրական դատարանը որոշել է, որ խորհրդարանի կողմից նախագահ Տրայան Բեսեսկուի պաշտոնանկության գործընթացն օրինական է։ Այս մասին հաղորդում է Reuters գործակալությունը։
Դատարանի որոշման մեջ ասվում է, որ խորհրդարանը Բեսեսկուին պաշտոնանկ անելիս չի խախտել ոչ մի օրենք։ Դատարանը նաև օրինական է համարել երկրի նախագահի ժամանակավոր պաշտոնակատարի նշանակման գործընթացը։
Հիշեցնենք, որ այդ գործառույթները դրվել են երկրի խորհրդարանի նախագահ Կրին Անտոնեսկուի վրա։ Այս որոշումը ենթադրում է, որ մինչև հուլիսի 29-ը` նախագահին վստահություն հայտնելու հանրաքվեի օրը, Բեսեսկուն չի կարողանա իրականացնել իր պարտականությունները։
Միաժամանակ դատարանն անօրինական է համարել երկրի խորհրդարանի այն որոշումը, որով սահմանափակվում էր Սահմանադրական դատարանի իրավունքը` քննարկելու խորհրդարանի կողմից ընդունված որոշումները։
Հիշեցնենք. երկրի նախագահի և վարչապետի հակամարտության արդյունքում հուլիսի 6-ին երկրի խորհրդարանն անվստահություն հայտնեց Տրայան Բեսեսկուին։ Հուլիսի 29-ին նրա ճակատագիրը կորոշվի համապետական հանրաքվեի միջոցով։
