Ադրբեջանական APA լրատվական գործակալության փոխանցմամբ՝ Ռուսաստանի Պետդումայի նախագահ Սերգեյ Նարիշկինը Բաքվի Սլավոնական համալսարանում ունեցած ելույթում անդրադարձել է Ղարաբաղյան հակամարտության կարգավորմանը.
«Ռուսաստանը մշտապես հանդես է եկել Հարավային Կովկասում անվտանգության ու կայունության հաստատման օգտին: Այդ համատեքստում կարևոր նշանակություն ունի Ղարաբաղյան հակամարտության կարգավորումը: Ռուսաստանի դիրքորոշումն այդ հարցում անփոփոխ է: Մենք դեմ ենք կողքից պատրաստված բաղադրատոմսերով հակամարտության կարգավորմանը:
Մենք մեծապես վստահ ենք, որ այդ խնդիրը կարող է լուծվել այն դեպքում, եթե ապահովվի երկու կողմի շահերը: Եթե գտնվի խնդրի լուծման այդպիսի ուղի, ապա Ռուսաստանը պատրաստ է հանդես գալ որպես այդ պայմանավորվածության երաշխավոր: Սակայն հակամարտության կարգավորման պատասխանատվությունը կընկնի Հայաստանի և Ադրբեջանի ժողովուրդների վրա:
Ռուսաստանի նախագահ Դմիտրի Մեդվեդևի նախաձեռնությամբ Հայաստանի և Ադրբեջանի նախագահների միջև անցկացվել է 10 հանդիպում: Չի կարելի այդ հանդիպումներն անվանել բացարձակապես անարդյունք: Հանդիպումների անցկացումը հնարավորություն է տվել հստակեցնել կողմերի դիրքորոշումներն ու հակամարտության կարգավորման ուղիները: Ես լավատես եմ, և հուսով եմ, որ այդ հակամարտությունը կստանա իր խաղաղ կարգավորումը»:
