Հայաստանում կաթնատվությունը եւ մսատվությունը զարգացնելու համար եվրոպական երկրներից 262 գլխաքանակ կով է ներկրվել Հայաստան եւ հատկացվել հանրապետության առաջատար ընկերություններին: 166 գլուխ հատկացվել է «Առգոհոլդինգ» ՍՊԸ-ին, որը տեղակայված է Լոռու մարզի Սպիտակ քաղաքում, 32 գլուխ հատկացվել է «Արզնի» տոհմային տավարաբուծական, խոզաբուծական, հավաբուծական բաժնետիրական ընկերությանը, 33 գլուխ` Սյունիքի մարզի Բռնակոթ գյուղի ֆերմային, 16 գլուխ` Սյունիքի մարզի Սալվարդ գյուղի ֆերմային եւ 15 գլուխ` Կոտայքի մարզի Լեռնանիստ գյուղի ֆերմային: Գյուղնախարարության աշխատակազմի անասնաբուծության եւ տոհմային գործի վարչության պետ Աշոտ Հովհաննիսյանը մեզ հետ զրույցում տեղեկացրեց, որ սրանք աշխարհի լավագույն կաթնատվություն ունեցող ցեղերն են: Մեկը որստին ցեղին է պատկանում, մյուսը` շվից ցեղին: Խոսելով Եվրոպայից ներկրված կովերի առավելության մասին` Աշոտ Հովհաննիսյանը ավելացրեց.«Հայաստանում մեր տեղական շուրջ 300 հազար կովերի միջին կաթնատվությունը կազմում է 1940 կգ, իսկ ներկրված կովերի միջին կաթնատվությունը 5000 կգ-ից ավելի է: Շվից ցեղն էլ, իր հերթին, ունի կաթնամսատու ուղղություն: Այսինքն` մսատու հատկանիշներն էլ են զարգացած, ինչը նպաստում է նաեւ մսատվության զարգացմանը, քանի որ գերազանցում է տեղական կովերի մսատվության ցուցանիշներին»: