Ոստիկանությունը «Հարսնաքար» ռեստորանի մոտ երեկ տեղի ունեցած մոմավառության ակցիայի ժամանակ ընդամենը իր գործառույթներն է իրականացրել, և հենց ոստիկանության աշխատակիցների գործողությունների շնորհիվ հնարավոր եղավ խուսափել անցանկալի զարգացումներից. «Առաջին լրատվական»-ի հետ զրույցում այս մասին ասաց ոստիկանության հասարակայնության հետ կապերի և լրատվության վարչության պետ Աշոտ Ահարոնյանը:
«Ոստիկանությունը մեկ անգամ ևս փաստում է, որ պայքարում է երևույթների և ոչ թե անձանց դեմ, և թե ինչ անձինք են կանգնած այդ երևույթների հետևում՝ ոստիկանության համար որևէ նշանակություն չունի»,- ասաց նա:
Հիշեցնենք. «Հարսնաքար» ռեստորանային համալիրի մոտ երեկ մոմավառության ակցիա է անցկացվել ՝ ի հիշատակ նույն ռեստորանային համալիրում ծեծի ենթարկված և օրեր անց հիվանդանոցում մահացած ռազմական բժիշկ Վահե Ավետյանի յոթնօրեքի:
Ակցիայի մասնակիցների և ոստիկանների միջև բախում էր տեղի ունեցել: Ոստիկանները պատ էին կազմել համալիրի մոտ և ակցիայի մասնակիցներին թույլ չէին տալիս մոտենալ շենքին: Ավելի ուշ ակցիայի մասնակիցները ստիպված էին դուրս գալ հարակից փողոց: Երևանի փոխոստիկանապետ, ոստիկանության գնդապետ Ռոբերտ Մելքոնյանն իր հերթին զգուշացրել էր, որ բոլորը դուրս գան Աճառյան փողոցի երթևեկելի տարածքից, այլապես ոստիկանությունը ուժ կկիրառի:
Դրանից հետո ժողովրդի վրա էին հարձակվել կարմիր բերետավորները և սաղավարտներով ու վահաններով զինված ոստիկանները:
Լուսանկարը՝ Գագիկ Շամշյանի