«Վանաձոր Քիմպրոմ»-ում նախատեսվող պարարտանյութերի արտադրությունն ունի և՛ դրական, և՛ բացասական կողմեր: Ագրարագյուղացիական միության նախագահ Հրաչ Բերբերյանն «Առաջին լրատվական»-ի հետ զրույցում հայտնեց, որ արտադրվելիք կալիումական պարարտանյութերի արդյունավետությունը կասկածելի է:
«Այդ կալիումը այն չէ, որ պիտանի է: Մարդիկ կարող են չհասկանալ, գնել և օգտագործել: Մեր հանրապետությունում հողերը կալիումով հագեցած են, բայց բույսերը չեն կարողանում կլանել՝ խոշոր է: 2 տարի առաջ փորձեցին անցկացնել իրենց մշակածը, չթողեցինք, հիմա նորից երևի ուզում են անցկացնել, բայց դա արդյունավետ չի: Իսկ կարբամիդը ստուգելը հեշտ է, եթե արտադրեն, լավ կլինի: Ճիշտ է, ամոնիակային սելիտրային չի փոխարինի, բայց էլի քայլ է առաջ: Հիմա 10 հազար դրամ է մի պրակը: Ինչ-որ ձևով շուկան կկարգավորվի»,- ասաց Հ. Բերբերյանը:
Նա հայտնեց, որ մարզպետները բողոքում են ցորենից. «Կրակն են ընկել սերմնացուի ձեռքը: 600-1000 հեկտարով ցանել են, բայց հասկի երկարությունը 17-18 սմ-ից ավելի չի: Հաշվեք, որ այդ բերքը կորել է, կոմբայնը չի կարող հավաքել: Մենք առաջարկում ենք գյուղնախարարի տեղակալներից ընդամենը մի հոգի թողնել»:
Հանրապետությունում խայտառակ վիճակում է նաև ոռոգումը. Ջրային պետական կոմիտեն նոր նորմատիվներ է սահմանել ու 11 հազար դրամանոց ոռոգումը 15 հազար են դարձրել:
«Ո՞վ է նրանց թույլ տվել: Եթե ՀԿ-ներ են մշակել, ո՞վ է իրավունք տվել նորմատիվ փոխել: Ո՞վ է դրանց հետևում կանգնած: Ընդհանրապես պահանջելու ենք բարեփոխումներ անել: 1500 խմ են տալիս 1 հա կարտոֆիլի համար` նախկին 750 խմ-ի փոխարեն, ու գյուղացին մոտ 30%-ով ավելի փող պետք է ծախսի: Հաշվիչներ էլ չեն դնում, նորմատիվներ են մշակել: Կարտոֆիլ ունես, ուրեմն 17 հազար պետք է մուծես, անցած տարվա 11 հազար դրամի փոխարեն»,- ասաց Հ. Բերբերյանը՝ նշելով, որ բոլոր մշակաբույսերի համար են ավելացրել նորմատիվները:
Նրա կարծիքով` ընդհանրապես այս ՋՕ-երի հարցը պետք է լուծել՝ վերացնել դրանք ու գյուղացուն տալ ջուրը:
«Մի ամիս էստեղ չէի, ոգևորվել էին, հա՞»,- եզրափակեց Հ. Բերբերյանը:
