Իտալիայի կառավարությունը հավանություն է տվել հակաճգնաժամային փաթեթին, որով նախատեսվում է 3 տարվա ընթացքում պետական ծախսերը կրճատել 26 մլրդ եվրոյով: Ինչպես հաղորդում է Agence France-Presse-ը, որոշումը կայացվել է հինգշաբթի լույս ուրբաթ գիշերը:
Ենթադրվում է, որ 2012 թ. պետական բյուջեի ծախսերը կկրճատվեն 4.5 մլրդ եվրոյով, 2013 թ.՝ 10.5 մլրդ-ով, իսկ 2014 թ.՝ 11 մլրդ-ով: Իտալիայի վարչապետ Մարիո Մոնտիի խոսքերով՝ ծախսերի կրճատման մեծ մասը բաժին կհասնի առողջապահության սեկտորին և պետական ու տեղական ինքնակառավարման վարչություններին:
3 տարվա ընթացքում Իտալիայում կհեռացվեն պետական սեկտորի աշխատակիցների 10%-ը և պետական ծառայությունների ղեկավարության 20%-ը: Կառավարությունը հույս ունի, որ բյուջեի ծախսերի կրճատումը թույլ կտա խուսափել հարկերի բարձրացումից, ինչը խորհուրդ էին տալիս տնտեսագետները:
Ապրիլին Իտալիայի իշխանություններն արդեն որոշել էին պետական ծախսերը կրճատել 4.2 մլրդ եվրոյով, սակայն հուլիսի սկզբին հայտնի դարձավ, որ դա բավարար չի լինի: Երեկ հաղորդվում էր, որ 2012 թ. առաջին քառորդում երկրի բյուջեի դեֆիցիտը ավելացել է մինչև ՀՆԱ 8%, ինչը ռեկորդային է համարվում 2009 թ. հետո: 2011 թ. առաջին քառորդում այդ ցուցիչը կազմել է ՀՆԱ 7%:
