Ամերիկյան բանկային համակարգում իրավիճակը դեռևս չի վերադարձել մինչճգնաժամային մակարդակին, սակայն զգալիորեն բարելավվել է` համեմատած նախկին 4 տարվա հետ: Այս մասին են վկայում ԱՄՆ Կենտրոնական բանկի գործառույթ իրականացնող երկրի դաշնային պահուստային համակարգի տարածած տվյալները:
Ինչպես տեղեկացնում է Itar-Tass-ը`կառույցի հաշվարկներով` ամերիկյան բանկերի շահույթը 2012-ի առաջին եռամսյակում կազմել է 35 միլիարդ դոլար, ինչը 6 միլիարդով ավելի է 2011-ի նույն ժամանակահատվածի շահույթից: Այս ցուցանիշը լավագույնն է վերջին 4 տարում: Ֆինանսատնտեսական ճգնաժամի ամենաթեժ պահին`2008 թվականին, վերջին եռամսյակում ամերիկյան բանկային ոլորտի կորուստները կազմել են 32 միլիարդ դոլար:
Նվազել է նաև սնանկացած բանկերի թիվը. եթե այդպիսիք 2009-ին 140-ն էին, 2010-ին` 157-ը, իսկ 2011-ին` 92-ը, ապա այս տարվա առաջին եռամսյակում սնանկացած բանկերը 31-ն են: Ընդհանուր առմամբ, 2008 թվականից սկսած, ԱՄՆ-ում սնանկացել են 445 ֆինանսական ինստիտուտներ:
Արդյունքում Ավանդների ապահովագրության դաշնային կորպորացիան, որը յուրաքանչյուր ավանդի անվտանգությունը երաշխավորում է մինչև 250 հազար դոլարով, ստիպված եղավ սպառողներին վերադարձնել 88 միլիարդ դոլար: 2012-2016թթ. կանխատեսումների համաձայն` կորպորացիան իր ֆոնդից կվճարի 12 միլիարդ դոլար: Խնդրահարույց բանկերի գաղտնի ցուցակում, որը կազմել է կորպորացիան, ապրիլին եղել է 772 ֆինանսական ինստիտուտ, մինչդեռ 1 տարի առաջ դրանք 888-ն էին:
Սնանկացման հետևանքով ամերիկյան բանկերի թիվը նվազել է. 2008-ի սկզբին դրանք 8533-ն էին, իսկ այսօր` 7292-ը:
Փորձագետները նշում են, որ բանկային համակարգը անմիջականորեն կախված է երկրի ընդհանուր մակրոտնտեսական վիճակից: Իսկ ԱՄՆ-ում կանխատեսումները լավատեսական չեն: Արժույթի միջազգային հիմնադրամի տվյալներով` ճգնաժամից ԱՄՆ տնտեսության դուրսբերումը դանդաղ կընթանա: Աճն այս տարի կկազմի 2 տոկոս, իսկ հաջորդ տարի` 2.3 տոկոս:
