Ամերիկյան «Stratfor» հետազոտական կենտրոնի փորձագետները կենտրոնի հրապարակած զեկույցում նշել են, որ Հայաստանում և հետխորհրդային մյուս պետություններում Եգիպտոսի իրադարձությունների կրկնությունը քիչ հավանական է:
«Հայաստանում լայնամասշտաբ բողոքի ակցիաների և անկարգությունների նախադրյալներ չկան, թեև Հայ ազգային կոնգրեսը, որը ղեկավարում է նախկին նախագահ Լևոն Տեր-Պետրոսյանը, ոգևորված Եգիպտոսում տեղի ունեցած իրադարձություններից, փետրվարի 18-ին մեծ հանրահավաք է հրավիրել»,- նշել են զեկույցի հեղինակները:
Քաղաքագետների միության նախագահ Հմայակ Հովհաննիսյանը «Առաջին լրատվական»-ի հետ զրույցում նշեց, որ Սերժ Սարգսյանը վաղուց է բարի դրացիական հարաբերություններ հաստատել «Stratfor»-ի հետ:
Քաղաքագետը հիշեցրեց, որ այս վերլուծական կենտրոնը ժամանակին հրապարակեց կանխատեսումներ Սերժ Սարգսյանի`ՀՀ վարչապետ, այնուհետև նախագահ դառնալու մասին: Հմայակ Հովհաննիսյանն ասաց, որ նախընտրելի է ուսումնասիրություններն անցկացնել տվյալ սոցիումի ներսում, որոնք էլ կարող են հնարավորինս օբյեկտիվ արտացոլել իրավիճակը:
Հմայակ Հովհաննիսյանը կարծում է, որ Հայաստանի և Եգիպտոսի, Թունիսի իրավիճակների միջև կան ավելի շատ ընդհանրություններ, քան տարբերություններ:
Քաղաքագետն ուշադրություն է հրավիրում «Freedom House» կազմակերպության զեկույցի վրա, որի` Հայաստանին վերաբերող մասում արձանագրված է եղել, որ Հայաստանում մեծ դեր են խաղում խնամիական, ազգակցական կապերը, և պետական ինստիտուտների աշխատակազմերը ձևավորվում են ազգակցական, խնամիական կապերի հիման վրա:
Եգիպտոսում ևս մեկ կուսակցություն է եղել, որը հաստատել է քաղաքական մենաշնորհ: Այդ նույն երևույթները բնորոշ են եղել նաև Թունիսի վարչակազմին:
Իսկ այդ մենաշնորհն, ըստ քաղաքագետի, արտահայտվում է նաև տնտեսական ոլորտում: Զուգահեռելով հայ իրականության հետ` Հմայակ Հովհաննիսյանը նշում է, որ Հայաստանում էլ այդ մենաշնորհը պատկանում է իշխող Հանրապետական կուսակցությանը:
Քաղաքագետի դիտարկումներով` ցածր կենսամակարդակի, միջին աշխատավարձի , գործազրկության տեսանկյունից Հայաստանում վիճակը շատ ավելի լուրջ է, քան` Եգիպտոսում:
Հմայակ Հովհաննիսյանը նշում է, որ իշխանություններն այսօր չեն կարողանում կանխատեսել, թե ինչ կլինի, եթե գազի գինը բարձրանա: Նա պատահական չի համարում, որ ՀՀ իշխանությունները դիմել են ՌԴ իշխանություններին, որպեսզի նրանք հետաձգեն գազի գնի բարձրացումը:
Անդրադառնալով գունավոր հեղափոխություններին` Հմայակ Հովհաննիսյանը նշեց, որ այդպիսի հեղափոխությունների ժամանակ մի վերնախավը մարտահրավեր է նետում մեկ այլ վերնախավի, ինչպես օրինակ, դա եղավ Ուկրաինայում և Վրաստանում:
Հմայակ Հովհաննիսյանը կարծում է, որ Հայաստանում հնարավոր չէ, որ տեղի ունենա գունավոր հեղափոխություն: Փոխարենը քաղաքագետը նշմարում է, որ Հայաստանում կարող է տեղի ունենալ սոցիալական պայթյուն, որի հետևանքները հնարավոր չէ կանխատեսել:
Նա կարծում է, որ այդ պայթյունն ուղորդելը, շրջանակների մեջ դնելը կլինի շատ դժվար: Եվ, ըստ քաղաքագետի, եթե Եգիպտոսում հավատ կա կրոնական համայնքների նկատմամբ, ապա Հայաստանում ո՛չ իշխանություններին են հավատում, ո՛չ էլ այսօրվա հոգևորականությանը:
